'కెప్టెన్ కూల్'కు 45 ఏళ్లు.. క్రికెట్ ప్రపంచం సెల్యూట్

ప్రపంచ క్రికెట్ చరిత్రలో అత్యంత విజయవంతమైన కెప్టెన్లలో ఒకరైన మహేంద్ర సింగ్ ధోని నేడు 45వ పుట్టినరోజు జరుపుకుంటున్నారు. రాంచీ వీధుల్లో సాధారణ యువకుడిగా మొదలైన ఆయన ప్రయాణం.. ప్రపంచ క్రికెట్‌ను శాసించే లెజెండ్‌గా ఎదిగిన గాథగా నిలిచిపోయింది.

538 అంతర్జాతీయ మ్యాచ్‌లు, 17,266 పరుగులు, వికెట్‌కీపర్‌గా 829 డిస్మిసల్స్‌తో ధోని ఎన్నో అరుదైన రికార్డులు తన పేరిట నమోదు చేసుకున్నాడు. అంతేకాదు, కెప్టెన్‌గా టీమిండియాకు టీ20 ప్రపంచకప్, వన్డే ప్రపంచకప్, ఛాంపియన్స్ ట్రోఫీ అందించి మూడు ఐసీసీ ట్రోఫీలు గెలిపించిన ఏకైక భారత కెప్టెన్‌గా చరిత్ర సృష్టించాడు.

టికెట్ కలెక్టర్‌గా ఉద్యోగం చేసిన ధోని.. తన ప్రతిభతో భారత జట్టులో స్థానం సంపాదించి, అనంతరం కోట్లాది మంది అభిమానుల హృదయాలను గెలుచుకున్నాడు. మైదానంలో ఎంతటి ఒత్తిడి పరిస్థితుల్లోనైనా ప్రశాంతంగా నిర్ణయాలు తీసుకునే తీరుతో 'కెప్టెన్ కూల్'గా గుర్తింపు పొందాడు. వికెట్ల వెనుక మెరుపు వేగంతో చేసే స్టంపింగ్స్, బ్యాటింగ్‌లో హెలికాప్టర్ షాట్‌తో ధోని క్రికెట్‌కు కొత్త గుర్తింపును తీసుకొచ్చాడు.

ధోని పుట్టినరోజు సందర్భంగా భారత క్రికెట్ నియంత్రణ మండలి (బీసీసీఐ) ప్రత్యేక శుభాకాంక్షలు తెలిపింది. "భారత క్రికెట్‌కు చిరస్మరణీయమైన సేవలు అందించిన ఐకాన్" అంటూ సోషల్ మీడియాలో పోస్ట్ చేసి మహీ సేవలను కొనియాడింది.

ఇక చెన్నై సూపర్ కింగ్స్ అభిమానుల్లో మాత్రం ఒకే ప్రశ్న వినిపిస్తోంది. ఐపీఎల్ 2026లో బరిలోకి దిగని ధోని.. వచ్చే సీజన్‌లో అయినా ఆడతాడా? గాయం కారణంగా ఈ సీజన్‌కు దూరమైనప్పటికీ, అధికారికంగా రిటైర్మెంట్ ప్రకటించకపోవడంతో అభిమానులు ఇంకా ఆశతో ఎదురుచూస్తున్నారు.

ధోని పుట్టినరోజు సందర్భంగా ఆయన చెప్పిన ఒక సందేశం కూడా సోషల్ మీడియాలో వైరల్ అవుతోంది. "ఒకరు మీ నమ్మకాన్ని వమ్ము చేశారని అందరినీ అనుమానించొద్దు. ప్రతి అనుభవం నుంచి పాఠం నేర్చుకుని జీవిత ప్రయాణంలో మంచి మనుషులను గుర్తించాలి" అనే ఆయన మాటలు అభిమానులను మరోసారి ఆలోచింపజేస్తున్నాయి.

క్రికెట్ మైదానంలో సాధించిన విజయాలతోనే కాదు.. జీవితాన్ని చూసే తన ప్రశాంతమైన దృక్పథంతోనూ ధోని కోట్లాది మందికి స్ఫూర్తిగా నిలిచాడు.