విశాఖలో పీవీ సింధు డ్రీమ్ ప్రాజెక్ట్.. స్పోర్ట్స్ అకాడమీకి మంత్రి లోకేష్ శంకుస్థాపన

భారత బ్యాడ్మింటన్ స్టార్, ఒలింపిక్ పతక విజేత పీవీ సింధు కలల ప్రాజెక్ట్‌కు విశాఖపట్నం వేదికైంది. అంతర్జాతీయ ప్రమాణాలతో నిర్మించనున్న 'పీవీ సింధు సెంటర్ ఫర్ స్పోర్ట్స్ ఎక్సలెన్స్' అకాడమీకి నేడు ఘనంగా శంకుస్థాపన జరిగింది. పీవీ సింధు ఫౌండేషన్ ఆధ్వర్యంలో నిర్మితమవుతున్న ఈ ప్రతిష్టాత్మక క్రీడా సంస్థకు ఆంధ్రప్రదేశ్ మానవ వనరుల అభివృద్ధి శాఖ మంత్రి నారా లోకేష్ ముఖ్య అతిథిగా హాజరై భూమి పూజ నిర్వహించారు.

విశాఖపట్నంలోని తోటగురువు ప్రాంతంలో ఏర్పాటు కానున్న ఈ స్పోర్ట్స్ సెంటర్ ద్వారా భావితరాల క్రీడాకారులకు ప్రపంచ స్థాయి శిక్షణ అందించడమే లక్ష్యంగా పెట్టుకున్నారు. చిన్నతనం నుంచి తాను ఎదుర్కొన్న అనుభవాలు, కోచ్‌లు అందించిన ప్రోత్సాహాన్ని దృష్టిలో పెట్టుకుని ఈ అకాడమీని ఏర్పాటు చేస్తున్నట్లు పీవీ సింధు తెలిపారు.

ప్రారంభంలో ఈ ప్రాజెక్ట్‌ను కేవలం బ్యాడ్మింటన్ అకాడమీగా మాత్రమే భావించినప్పటికీ, ముఖ్యమంత్రి నారా చంద్రబాబు నాయుడు సూచనలతో దీన్ని విస్తరించి మొత్తం తొమ్మిది క్రీడా విభాగాలకు శిక్షణ అందించే సమగ్ర స్పోర్ట్స్ సెంటర్‌గా అభివృద్ధి చేయాలని నిర్ణయించారు. "ఒలింపిక్ పతకాలు ఒక తరానికి మాత్రమే స్ఫూర్తినిస్తాయి. కానీ క్రీడా సంస్థలు తరతరాల ఛాంపియన్లను తయారు చేస్తాయి" అని పీవీ సింధు పేర్కొన్నారు.

ఈ కార్యక్రమంలో మంత్రి నారా లోకేష్ మాట్లాడుతూ, రాష్ట్రంలో క్రీడా రంగ అభివృద్ధికి ప్రభుత్వం పూర్తి స్థాయిలో అండగా ఉంటుందని హామీ ఇచ్చారు. అకాడమీ అభివృద్ధికి అవసరమైన అన్ని అనుమతులు, మౌలిక సదుపాయాలు కల్పించేందుకు ప్రభుత్వం సిద్ధంగా ఉందన్నారు. విశాఖపట్నాన్ని అంతర్జాతీయ స్థాయి స్పోర్ట్స్ హబ్‌గా తీర్చిదిద్దేందుకు ప్రభుత్వం కట్టుబడి ఉందని తెలిపారు.

ఈ కార్యక్రమంలో మంత్రి రాంప్రసాద్ రెడ్డి, టీడీపీ రాష్ట్ర అధ్యక్షుడు పల్లా శ్రీనివాసరావుతో పాటు పీవీ సింధు కుటుంబ సభ్యులు, పలువురు ప్రజాప్రతినిధులు, క్రీడా ప్రముఖులు పాల్గొన్నారు. ఈ అకాడమీ ద్వారా ప్రపంచ స్థాయి క్రీడాకారులను తయారు చేయాలన్న పీవీ సింధు లక్ష్యం నెరవేరుతుందని క్రీడాభిమానులు ఆశాభావం వ్యక్తం చేస్తున్నారు.