బీచుపల్లి ఆంజనేయస్వామి.. 500 ఏళ్ల మహిమాన్విత క్షేత్రం

తెలంగాణలోని జోగులాంబ గద్వాల జిల్లా, కృష్ణానది తీరాన వెలసిన బీచుపల్లి ఆంజనేయస్వామి ఆలయం హనుమాన్ భక్తులకు అత్యంత పవిత్రమైన క్షేత్రంగా ప్రసిద్ధి చెందింది. సుమారు 500 ఏళ్ల చరిత్ర కలిగిన ఈ ఆలయం విజయనగర సామ్రాజ్య కాలానికి చెందిన ఆధ్యాత్మిక వారసత్వాన్ని నేటికీ సజీవంగా నిలబెడుతోంది.

స్థల పురాణం ప్రకారం, శ్రీకృష్ణదేవరాయల గురువైన శ్రీ వ్యాసరాయలు  దేశవ్యాప్తంగా ప్రతిష్ఠించిన 378 హనుమాన్ విగ్రహాల్లో బీచుపల్లి స్వామివారి విగ్రహం కూడా ఒకటి. ఇక్కడి హనుమంతుడు ఇరువైపులా శంఖు, చక్రాలతో దర్శనమివ్వడం ఈ ఆలయానికి ప్రత్యేకతగా భావిస్తారు.

ఈ క్షేత్రంలో నేటికీ కొనసాగుతున్న మరో విశిష్ట సంప్రదాయం భక్తులను ఆకట్టుకుంటుంది. విగ్రహ ప్రతిష్ఠ అనంతరం మొదటగా దర్శనానికి వచ్చిన బీసన్న అనే బోయ బాలుడిని పూజారిగా నియమించాలన్న వ్యాసరాయల ఆదేశంతో, అప్పటి నుంచి ఇప్పటివరకు బోయ వంశీయులే తొలి పూజ, హారతి నిర్వహించడం ఆనవాయితీగా కొనసాగుతోంది.

ఆలయ సమీపంలోని కలిమి చెట్టు కూడా భక్తుల విశ్వాసానికి ప్రతీకగా నిలిచింది. ఏ కాలమైనా ఈ చెట్టుకు పువ్వు, కాయ లేదా పండు కనిపిస్తూనే ఉంటుందని స్థానికులు చెబుతారు. ఈ చెట్టును ప్రదక్షిణ చేస్తే కుటుంబంలో ఐశ్వర్యం, సుభిక్షం కలుగుతాయని భక్తుల నమ్మకం.

ప్రతి రోజు నాలుగు సార్లు నిత్యపూజలు, హారతులు నిర్వహించే ఈ ఆలయంలో మంగళవారం, శనివారం రోజుల్లో అభిషేకాలు, ఆకుపూజ, సింధూర పూజలు ప్రత్యేకంగా జరుగుతాయి. హనుమజ్జయంతి, శ్రీరామనవమి ఉత్సవాలను వైభవంగా నిర్వహిస్తారు. ప్రతి ఏడాది మే నెలలో జరిగే ఐదు రోజుల బ్రహ్మోత్సవాల్లో తెప్పోత్సవం, సీతారామ కళ్యాణం, రథోత్సవం, పల్లకీ సేవలు వేలాది మంది భక్తులను ఆకర్షిస్తాయి.

కృష్ణా నది ఒడ్డున ప్రశాంత వాతావరణంలో వెలసిన ఈ క్షేత్రాన్ని దర్శించేందుకు తెలుగు రాష్ట్రాలతో పాటు దేశం నలుమూలల నుంచి భక్తులు తరలివస్తుంటారు. ఆంజనేయస్వామి అనుగ్రహంతో కార్యసిద్ధి, మనశ్శాంతి, ధైర్యం, విజయాలు కలుగుతాయని భక్తులు విశ్వసిస్తారు.