స్టైల్ కోసం మొదలై.. ప్రాణాలకు ముప్పుగా ఈ-సిగరెట్లు

కొత్త ట్రెండ్స్‌ను త్వరగా అనుసరించే యువతలో ప్రస్తుతం ఈ-సిగరెట్ల (వేపింగ్) వినియోగం పెరుగుతోంది. పొగ రాదు, పొగాకు ఉండదు, స్టైలిష్‌గా కనిపిస్తుందనే భావనతో చాలామంది వీటిని ఉపయోగిస్తున్నారు. అయితే సాధారణ సిగరెట్లతో పోలిస్తే ఇవి కూడా ఆరోగ్యానికి తీవ్రమైన హాని కలిగిస్తాయని వైద్యులు హెచ్చరిస్తున్నారు.

ఇటీవల యువత మాదకద్రవ్యాలు, మద్యం వంటి వ్యసనాలతో పాటు ఈ-సిగరెట్ల వైపు కూడా ఆకర్షితులవుతున్నారని అధికారులు చెబుతున్నారు. పొగ కనిపించకపోవడం వల్ల ఇవి సురక్షితమనే అపోహ చాలా మందిలో ఉంది. కానీ ఈ-సిగరెట్లలో ఉండే రసాయనాలు ఊపిరితిత్తులపై తీవ్ర ప్రభావం చూపే అవకాశం ఉందని నిపుణులు సూచిస్తున్నారు.

ముఖ్యంగా విజయవాడలోని పటమట, కృష్ణలంక పోలీస్ స్టేషన్ పరిధిలో యువత ఈ-సిగరెట్లు వినియోగిస్తున్నట్లు పోలీసులు గుర్తించారు. విద్యార్థుల్లో కూడా ఈ అలవాటు పెరుగుతుండటంతో పోలీసులు అప్రమత్తమై తల్లిదండ్రులకు కౌన్సెలింగ్ నిర్వహిస్తూ అవగాహన కల్పిస్తున్నారు.

ఈ-సిగరెట్లు ఆన్‌లైన్‌లో సులభంగా లభిస్తుండటంతో వాటి వినియోగం మరింత పెరుగుతోందని పోలీసులు చెబుతున్నారు. ఈ-కామర్స్ ద్వారా సులభంగా ఆర్డర్ చేసుకునే అవకాశం ఉండటంతో యువత వీటిని ఎక్కువగా కొనుగోలు చేస్తున్నట్లు గుర్తించారు.

వైద్యుల ప్రకారం ఈ-సిగరెట్లలో నికోటిన్ కలిగిన లిక్విడ్‌తో పాటు రుచి, సువాసన కోసం వివిధ రకాల రసాయనాలను ఉపయోగిస్తారు. ఈ లిక్విడ్ వేడెక్కినప్పుడు ఏర్పడే సూక్ష్మ కణాలు ఊపిరితిత్తుల్లోకి చేరి ఆరోగ్యంపై ప్రతికూల ప్రభావం చూపే ప్రమాదం ఉంది. దీర్ఘకాలంలో శ్వాసకోశ సమస్యలు, గుండె సంబంధిత ఇబ్బందులు, నికోటిన్ వ్యసనం వంటి సమస్యలు తలెత్తే అవకాశం ఉందని నిపుణులు హెచ్చరిస్తున్నారు.

విద్యార్థుల్లో ఏకాగ్రత, జ్ఞాపకశక్తిపై కూడా ప్రతికూల ప్రభావం పడే అవకాశం ఉందని వైద్యులు పేర్కొంటున్నారు. ఈ-సిగరెట్లకు అలవాటు పడిన వారు వీలైనంత త్వరగా వాటిని మానేయాలని, అవసరమైతే వైద్యుల సలహాతో డీ-అడిక్షన్ లేదా బిహేవియరల్ థెరపీ తీసుకోవాలని సూచిస్తున్నారు.

యువత ఆరోగ్యాన్ని దృష్టిలో ఉంచుకుని ఈ-సిగరెట్ల వినియోగాన్ని అరికట్టేందుకు పోలీసులు నిఘా పెంచుతున్నారు. తల్లిదండ్రులు కూడా పిల్లల అలవాట్లపై అప్రమత్తంగా ఉండి, ఇటువంటి వ్యసనాలపై అవగాహన కల్పించాలని అధికారులు సూచిస్తున్నారు.