ఈ-కేవైసీ చేయలేదా? గ్యాస్ కనెక్షన్ నిలిచిపోయిందా.. ఇలా చేయండి

గ్యాస్ కనెక్షన్‌కు ఈ-కేవైసీ (e-KYC) పూర్తి చేయని వినియోగదారులకు ఆయిల్ మార్కెటింగ్ కంపెనీలు కీలక సూచనలు చేస్తున్నాయి. నిర్ణయించిన గడువులోపు ఈ-కేవైసీ పూర్తి చేయని కొన్ని గ్యాస్ కనెక్షన్లను తాత్కాలికంగా నిలిపివేయడంతో పలువురు వినియోగదారులు గ్యాస్ సిలిండర్ బుకింగ్ చేయలేక ఇబ్బందులు ఎదుర్కొంటున్నారు.

అయితే ఆందోళన చెందాల్సిన అవసరం లేదు. తాత్కాలికంగా నిలిపివేసిన గ్యాస్ కనెక్షన్‌ను తిరిగి యాక్టివ్ చేసుకునే అవకాశం ఉంది. ఇందుకోసం సంబంధిత గ్యాస్ ఏజెన్సీకి వెళ్లి బయోమెట్రిక్ ధృవీకరణతో పాటు ఈ-కేవైసీ ప్రక్రియను పూర్తి చేయాలి. ప్రక్రియ పూర్తైన వెంటనే గ్యాస్ కనెక్షన్‌ను పునరుద్ధరించి, మళ్లీ సాధారణంగా గ్యాస్ సిలిండర్ బుకింగ్ చేసుకునే అవకాశం కల్పిస్తారు.

గ్యాస్ కనెక్షన్లు, సిలిండర్ల సరఫరాలో అక్రమాలను అరికట్టేందుకు కేంద్ర ప్రభుత్వం ఈ-కేవైసీని తప్పనిసరి చేసింది. ఇందుకు సంబంధించి ఆయిల్ కంపెనీలు, పౌర సరఫరాల శాఖ అధికారులు పలుమార్లు వినియోగదారులను అప్రమత్తం చేశారు. గడువు ముగిసినా ఇంకా ఈ-కేవైసీ పూర్తి చేయని వారి కనెక్షన్లను తాత్కాలికంగా నిలిపివేస్తున్నారు.

గ్యాస్ కనెక్షన్ నిలిచిపోయిన వారు ఆలస్యం చేయకుండా తమ గ్యాస్ ఏజెన్సీని సంప్రదించి ఈ-కేవైసీ పూర్తి చేయడం ద్వారా కనెక్షన్‌ను తిరిగి పునరుద్ధరించుకోవాలని అధికారులు సూచిస్తున్నారు. భవిష్యత్తులో ఇలాంటి ఇబ్బందులు తలెత్తకుండా వీలైనంత త్వరగా ఈ ప్రక్రియ పూర్తి చేసుకోవడం మంచిది.