అత్త చనిపోవాలంటూ హుండీలో రూ.20 నోటు

సాధారణంగా భక్తులు ఆలయాలకు వెళ్లి ఆరోగ్యం, ఉద్యోగం, వ్యాపారం, కుటుంబ సుఖశాంతి కోసం దేవుడిని ప్రార్థిస్తుంటారు. అయితే అనంతపురం జిల్లాలోని ఓ ఆలయంలో హుండీ లెక్కింపు సమయంలో వెలుగుచూసిన ఘటన అందరినీ ఆశ్చర్యానికి గురిచేసింది. ఓ భక్తురాలు తన అత్త త్వరగా చనిపోవాలంటూ రూ.20 కరెన్సీ నోటుపై రాసి హుండీలో వేయడం చర్చనీయాంశంగా మారింది.

అనంతపురం జిల్లా ఆత్మకూరు మండలం పంపనూరులోని శ్రీ సుబ్రహ్మణ్యేశ్వర స్వామి ఆలయంలో ఇటీవల హుండీ లెక్కింపు నిర్వహించారు. ఈ సందర్భంగా హుండీలో ఉన్న నగదు లెక్కిస్తుండగా, రెండు రూ.20 నోట్లపై రాసిన సందేశాలు ఆలయ సిబ్బందిని ఆశ్చర్యానికి గురిచేశాయి.

ఒక నోటుపై “స్వామీ... మా అత్త వేధింపులు తట్టుకోలేకపోతున్నాను. తొందరగా మా అత్త చనిపోయేలా చూడు” అని రాసి ఉండగా, మరో నోటుపై “స్వామీ... మా అత్త త్వరగా చనిపోవాలి” అని రాసి ఉంది. ఈ వింత వినతిని చూసిన ఆలయ సిబ్బంది, భక్తులు అవాక్కయ్యారు.

ఆలయానికి తరచూ వచ్చే భక్తుల్లో ఎవరో ఒక మహిళ ఈ నోట్లను హుండీలో వేసి ఉండవచ్చని భావిస్తున్నారు. కుటుంబంలో ఎదురవుతున్న సమస్యలు, అత్త వేధింపుల కారణంగా తీవ్ర మానసిక ఒత్తిడికి గురై ఇలా దేవుడికి తన బాధను వ్యక్తం చేసి ఉండవచ్చని స్థానికులు అభిప్రాయపడుతున్నారు.

ఈ ఘటన ప్రస్తుతం సోషల్ మీడియాలోనూ చర్చకు దారితీసింది. కొందరు దీనిని సరదాగా తీసుకుంటుండగా, మరికొందరు కుటుంబ విభేదాలు, మానసిక ఒత్తిళ్లు ఎంత తీవ్ర స్థాయికి చేరుకుంటున్నాయో చెప్పే ఉదాహరణగా పేర్కొంటున్నారు.

ఏదేమైనా, దేవుడికి మొక్కుకునే కోరికల్లో ఇలాంటి వినతి వెలుగుచూడడం స్థానికంగా ఆసక్తికర చర్చకు కారణమైంది.