ఏలినాటి శని అంటే ఏమిటి? ఈ పరిహారాలతో ఉపశమనం పొందొచ్చా?

"శని" అనే పేరు వినగానే చాలామంది భయపడుతుంటారు. ముఖ్యంగా ఏలినాటి శని ప్రారంభమైందంటే జీవితంలో కష్టాలు వస్తాయనే భావన చాలా మందిలో ఉంటుంది. అయితే జ్యోతిష్య నిపుణుల అభిప్రాయం ప్రకారం, ఏలినాటి శని ప్రతి వ్యక్తి జీవితంలో ఒక దశలో తప్పనిసరిగా వచ్చే గ్రహ సంచారం మాత్రమే. దీనిని భయపడాల్సిన అవసరం లేదని, సరైన అవగాహనతో ఎదుర్కోవాలని సూచిస్తున్నారు.

జ్యోతిష్య శాస్త్రం ప్రకారం శని గ్రహం జన్మరాశికి 12వ, 1వ, 2వ స్థానాల్లో సంచరించే కాలాన్ని ఏలినాటి శని లేదా ఏడున్నర శని అంటారు. ఒక్కో రాశిలో శని సుమారు రెండున్నర సంవత్సరాలు ఉండటంతో మొత్తం ఈ కాలం ఏడున్నర సంవత్సరాలు ఉంటుంది.

ఈ సమయంలో ఉద్యోగం, ఆర్థిక వ్యవహారాలు, కుటుంబ జీవితం, ఆరోగ్యానికి సంబంధించిన కొన్ని సవాళ్లు ఎదురయ్యే అవకాశముందని పండితులు చెబుతారు. అయితే పనులు ఆలస్యం కావచ్చు గానీ పూర్తిగా ఆగిపోవని, ఇతర గ్రహాల ప్రభావం కూడా ఫలితాలను నిర్ణయిస్తుందని వివరిస్తున్నారు.

శని ప్రభావం తగ్గించుకోవడానికి కొందరు జ్యోతిష్యులు కొన్ని ఆధ్యాత్మిక పరిహారాలను సూచిస్తున్నారు. విష్ణు సహస్రనామం, సుందరకాండ, ఆదిత్య హృదయం పారాయణం చేయడం, శనివారాల్లో శనీశ్వరుడికి నువ్వుల నూనెతో దీపం వెలిగించడం, నవగ్రహాలకు ప్రదక్షిణలు చేయడం, పరమేశ్వరుని పంచాక్షరీ మంత్రాన్ని జపించడం వంటి ఆచారాలను పాటిస్తారు.

అదే విధంగా కాకులకు, పక్షులకు, ఆవులకు ఆహారం పెట్టడం, అవసరమైన వారికి అన్నదానం చేయడం, దానం చేయడం వంటి సేవా కార్యక్రమాలు కూడా శుభప్రదంగా భావిస్తారు. 

గమనిక: పై వివరాలు హిందూ జ్యోతిష్య సంప్రదాయాలు, పండితుల అభిప్రాయాల ఆధారంగా అందించబడినవి. వీటికి ఆధునిక శాస్త్రీయ ఆధారాలు ఉండకపోవచ్చు. వాటిని విశ్వసించడం లేదా అనుసరించడం పూర్తిగా వ్యక్తిగత నిర్ణయం.