కోపంతో ఊగిపోయిన పొలార్డ్.. పాక్ బౌలర్‌కు బ్యాట్ చూపించి వార్నింగ్!

మేజర్ లీగ్ క్రికెట్ (MLC) 2026 సీజన్‌లో కీరన్ పొలార్డ్ మరోసారి తన ఆగ్రహంతో వార్తల్లో నిలిచాడు. వాషింగ్టన్ ఫ్రీడమ్, ఎంఐ న్యూయార్క్ మధ్య జరిగిన మ్యాచ్‌లో పొలార్డ్, యూఎస్ఏ పేసర్ ఆసిఫ్ మహమూద్ మధ్య చోటుచేసుకున్న ఘటన ప్రస్తుతం సోషల్ మీడియాలో వైరల్‌గా మారింది.

ఈ మ్యాచ్‌లో తొలుత బ్యాటింగ్ చేసిన వాషింగ్టన్ ఫ్రీడమ్ నిర్ణీత 20 ఓవర్లలో 5 వికెట్ల నష్టానికి 245 పరుగుల భారీ స్కోరు నమోదు చేసింది. అనంతరం లక్ష్య ఛేదనకు దిగిన ఎంఐ న్యూయార్క్ జట్టు తరపున కెప్టెన్ కీరన్ పొలార్డ్ ఒంటరి పోరాటం చేశాడు.

అయితే ఎంఐ న్యూయార్క్ ఇన్నింగ్స్‌లో 9వ ఓవర్ చివరి బంతి సందర్భంగా ఆసక్తికర ఘటన చోటు చేసుకుంది. యూఎస్ఏ తరపున ఆడుతున్న పాకిస్థాన్ సంతతి బౌలర్ ఆసిఫ్ మహమూద్ వేసిన బంతిని పొలార్డ్ సరిగా కనెక్ట్ చేయలేకపోయాడు. బంతి నేరుగా బౌలర్ చేతుల్లోకి వెళ్లింది.

షాట్ ఆడిన తర్వాత క్రీజు నుంచి కాస్త ముందుకు వచ్చిన పొలార్డ్ తిరిగి క్రీజులోకి చేరేందుకు ప్రయత్నిస్తుండగా, ఆసిఫ్ మహమూద్ రనౌట్ చేసే ఉద్దేశంతో స్ట్రైకర్ ఎండ్ వికెట్ల వైపు బంతిని విసిరేందుకు సిద్ధమయ్యాడు. ఇదే సమయంలో పొలార్డ్ ఒక్కసారిగా ఆగ్రహానికి గురయ్యాడు.

క్రీజులో బ్యాట్ ఉంచి సేఫ్ కావాల్సిన పరిస్థితిలో, అతడు తన బ్యాట్‌ను పైకెత్తి బౌలర్ వైపు హెచ్చరికగా చూపించాడు. "బంతి విసిరితే బ్యాట్‌తో ఎదుర్కొంటా" అన్నట్లుగా పొలార్డ్ ఇచ్చిన రియాక్షన్ చూసి ఆసిఫ్ మహమూద్ త్రో చేయకుండా వెనక్కి తగ్గినట్లు వీడియోలో కనిపించింది.

ఈ ఘటనకు సంబంధించిన వీడియో సోషల్ మీడియాలో వైరల్ అవుతుండగా, అభిమానులు తమదైన శైలిలో స్పందిస్తున్నారు. ముఖ్యంగా ఐపీఎల్‌లో గతంలో ముంబై ఇండియన్స్ తరఫున ఆడిన సమయంలో కీరన్ పొలార్డ్, ఆర్సీబీ స్టార్ పేసర్ మిచెల్ స్టార్క్ మధ్య జరిగిన వివాదాస్పద ఘటనను పలువురు గుర్తు చేస్తున్నారు. "పొలార్డ్ స్టైల్ మారలేదు" అంటూ కామెంట్లు చేస్తున్నారు.

ఇక మ్యాచ్ విషయానికి వస్తే, కీరన్ పొలార్డ్ అద్భుత బ్యాటింగ్‌తో 56 బంతుల్లో సెంచరీ పూర్తి చేసి అజేయంగా నిలిచాడు. అయినప్పటికీ అతడి పోరాటం జట్టును గెలిపించలేకపోయింది. భారీ లక్ష్యాన్ని ఛేదించలేక ఎంఐ న్యూయార్క్ 30 పరుగుల తేడాతో ఓటమి పాలైంది.సెంచరీతో మెరిసినప్పటికీ, పొలార్డ్ కోపం మాత్రం ఇప్పుడు మ్యాచ్ కంటే ఎక్కువగా చర్చనీయాంశమవుతోంది.