టీమిండియాకు జింబాబ్వే సవాల్‌.. శ్రేయాస్ కెప్టెన్సీకి కీలక పరీక్ష

రెండు వరుస టీ20 సిరీస్‌ల్లో నిరాశాజనక ఫలితాల తర్వాత భారత జట్టు మరో సవాల్‌కు సిద్ధమైంది. మూడు మ్యాచ్‌ల టీ20 సిరీస్‌లో భాగంగా గురువారం హరారే వేదికగా జింబాబ్వేతో తొలి మ్యాచ్ ఆడనుంది. వరుస పరాజయాల తర్వాత ఈ సిరీస్‌లో విజయంతో పుంజుకోవాలని టీమిండియా లక్ష్యంగా పెట్టుకుంది.

శ్రేయాస్‌కు అగ్నిపరీక్ష

ఈ సిరీస్ కెప్టెన్ శ్రేయాస్ అయ్యర్‌కు ఎంతో కీలకం. సారథిగా తొలి ఏడు టీ20 మ్యాచ్‌ల్లో ఆరు ఓటములు ఎదుర్కొన్న శ్రేయాస్‌పై ఒత్తిడి నెలకొంది. జింబాబ్వేపై సిరీస్ గెలిచి తన నాయకత్వాన్ని నిరూపించుకోవాల్సిన పరిస్థితి ఏర్పడింది.

వైభవ్‌పై ప్రత్యేక దృష్టి

15 ఏళ్ల యువ సంచలనం వైభవ్ సూర్యవంశీపై మరోసారి అందరి చూపు ఉంది. ఇదే హరారే మైదానంలో ఐదు నెలల క్రితం అండర్-19 ప్రపంచకప్ ఫైనల్లో సెంచరీతో మెరిసిన వైభవ్... మరోసారి అదే మ్యాజిక్ చేస్తాడా అన్న ఆసక్తి నెలకొంది.

అభిషేక్‌కు అచ్చొచ్చిన వేదిక

ఓపెనర్ అభిషేక్‌కు కూడా హరారే ప్రత్యేకమైన మైదానం. తన తొలి అంతర్జాతీయ టీ20 సెంచరీని ఇదే గ్రౌండ్‌లో నమోదు చేశాడు. వైభవ్, అభిషేక్ జోడీ శుభారంభం అందిస్తే భారత్ భారీ స్కోరు చేసే అవకాశాలు ఉన్నాయి.

తిలక్ వర్మ బ్యాటింగ్ స్థానం ఆసక్తికరం

టీ20ల్లో సాధారణంగా మూడో స్థానంలో బ్యాటింగ్ చేసే తిలక్ వర్మను ఇటీవల ఐదో స్థానంలో ఆడిస్తున్నారు. అయితే ఆ స్థానంలో అతడు ఆశించిన ప్రభావం చూపలేకపోతున్నాడు. ఈ మ్యాచ్‌లో తాత్కాలిక కోచ్ వీవీఎస్ లక్ష్మణ్ తిలక్‌ను ఏ స్థానంలో పంపిస్తారన్నది ఆసక్తికరంగా మారింది.

జట్టులో పోటీ

హర్ష్ దూబే, శివమ్ దూబే, సూర్యాన్ష్ షెగ్డేలలో ఇద్దరికే తుది జట్టులో అవకాశం దక్కే అవకాశం ఉంది. పేస్ విభాగంలో మయాంక్ యాదవ్‌తో కలిసి ప్రిన్స్ యాదవ్ కొత్త బంతిని పంచుకునే అవకాశముండగా, మూడో పేసర్ స్థానానికి యశ్ ఠాకూర్, అశోక్ శర్మ మధ్య పోటీ నెలకొంది.

అంచనా జట్లు

భారత్: శ్రేయాస్ అయ్యర్ (కెప్టెన్), వైభవ్ సూర్యవంశీ, అభిషేక్ శర్మ, ఇషాన్ కిషన్, తిలక్ వర్మ, రింకూ సింగ్, శివమ్ దూబే, హర్ష్ దూబే, ప్రిన్స్ యాదవ్, మయాంక్ యాదవ్, యశ్ ఠాకూర్ / అశోక్ శర్మ.

జింబాబ్వే: సికందర్ రజా (కెప్టెన్), బ్రియాన్ బెన్నెట్, మరుమణి, డియాన్ మైర్స్ / వెస్లీ మధెవెరె, ర్యాన్ బర్ల్, బ్రాడ్ ఇవాన్స్, మసకద్జా, మిల్టన్ శుంబా, న్యూమన్ న్యామూరీ, ఎన్‌గరావా, బ్లెస్సింగ్ ముజరబాని.