ఫుడ్ సేఫ్టీ తనిఖీల ఎఫెక్ట్ .. హైదరాబాద్‌లో వెలుస్తున్న ‘లైవ్ కిచెన్’కాన్సెప్ట్‌

హైదరాబాద్‌లో ఇటీవల ఫుడ్ సేఫ్టీ అధికారులు నిర్వహిస్తున్న వరుస తనిఖీలు హోటల్ పరిశ్రమలో మార్పులకు దారితీశాయి. స్టార్ హోటళ్ల నుంచి చిన్న రెస్టారెంట్లు, క్లౌడ్ కిచెన్ల వరకు అపరిశుభ్ర వాతావరణం, గడువు ముగిసిన ఆహార పదార్థాల వినియోగం, పరిశుభ్రత లోపాలు వెలుగులోకి రావడంతో ప్రజల్లో ఆందోళన పెరిగింది. సోషల్ మీడియాలో వైరల్ అయిన వీడియోలు, ఫొటోల ప్రభావంతో చాలా మంది బయట భోజనం చేయడానికి వెనుకంజ వేస్తున్నారు.

ఈ పరిస్థితుల్లో వినియోగదారుల నమ్మకాన్ని తిరిగి పొందేందుకు హైదరాబాద్‌లోని పలు రెస్టారెంట్లు కొత్త విధానాన్ని అమలు చేస్తున్నాయి. ‘లైవ్ కిచెన్ డిస్‌ప్లే స్క్రీన్’పేరుతో కిచెన్‌లో జరుగుతున్న కార్యకలాపాలను నేరుగా కస్టమర్లకు చూపించే ఏర్పాట్లు చేస్తున్నారు.రెస్టారెంట్‌లో ఏర్పాటు చేసిన పెద్ద డిజిటల్ స్క్రీన్లను కిచెన్‌లోని సీసీ కెమెరాలకు అనుసంధానం చేస్తున్నారు. దీంతో కస్టమర్లు తమ ఆహారం ఎలా తయారవుతోంది, సిబ్బంది గ్లోవ్స్, హెయిర్ క్యాప్స్ వంటి భద్రతా పరికరాలు ఉపయోగిస్తున్నారా, వంటగది ఎంత పరిశుభ్రంగా ఉందో ప్రత్యక్షంగా చూడగలుగుతున్నారు.అంతేకాకుండా నాన్‌వెజ్ స్టోరేజ్, కోల్డ్ స్టోరేజ్, డీప్ ఫ్రీజర్లు, వాషింగ్ ఏరియాలను కూడా సీసీ కెమెరాల పరిధిలో ఉంచి స్క్రీన్ల ద్వారా ప్రదర్శిస్తున్నారు. దీంతో ఆహార భద్రతపై వినియోగదారులకు మరింత నమ్మకం కలుగుతోంది.

ఈ పారదర్శక విధానానికి నగరవాసుల నుంచి మంచి స్పందన లభిస్తున్నట్లు హోటల్ యాజమాన్యాలు చెబుతున్నాయి. గతంలో రుచికే ప్రాధాన్యం ఇచ్చిన వినియోగదారులు ఇప్పుడు పరిశుభ్రతను కూడా పరిశీలించి రెస్టారెంట్లను ఎంపిక చేసుకుంటున్నారు. దీనివల్ల కొన్ని హోటళ్లకు గూగుల్ రేటింగ్స్ కూడా మెరుగుపడుతున్నాయని నిర్వాహకులు పేర్కొంటున్నారు.

మరోవైపు, కస్టమర్లు ఎప్పటికప్పుడు గమనిస్తున్నారనే అవగాహనతో హోటల్ సిబ్బంది కూడా పరిశుభ్రత ప్రమాణాలను మరింత కచ్చితంగా పాటిస్తున్నారు. ఫుడ్ సేఫ్టీ తనిఖీలతో ప్రారంభమైన ఈ మార్పు ప్రస్తుతం హోటళ్ల మధ్య నాణ్యత, పరిశుభ్రత విషయంలో ఆరోగ్యకరమైన పోటీకి దారితీస్తోంది.

అయితే, ఈ విధానం అన్ని హోటళ్లలో తప్పనిసరిగా అమల్లో ఉందని కాదు. ప్రస్తుతం కొన్ని రెస్టారెంట్లు మాత్రమే వినియోగదారుల విశ్వాసాన్ని పెంచేందుకు స్వచ్ఛందంగా ‘లైవ్ కిచెన్ డిస్‌ప్లే’ విధానాన్ని అమలు చేస్తున్నాయి. నిపుణుల అభిప్రాయం ప్రకారం, ఇటువంటి పారదర్శక చర్యలు విస్తృతంగా అమలైతే వినియోగదారుల్లో ఆహార భద్రతపై మరింత విశ్వాసం పెరిగే అవకాశం ఉంది.