అప్పు తీర్చేందుకు కొత్త ఎత్తుగడ.. కంకర రాళ్లకు బంగారం పూత పూసి మోసం

అప్పు తీర్చాల్సిన సమయంలో కొందరు ఎంతకైనా తెగిస్తున్నారనడానికి నిజామాబాద్ జిల్లాలో జరిగిన ఈ ఘటన నిదర్శనంగా నిలిచింది. కంకర రాళ్లకు బంగారం పూత పూసి వాటిని విలువైన బంగారు రాళ్లుగా నమ్మించి ఓ వ్యక్తిని మోసం చేసిన ఘటన డిచ్‌పల్లి పోలీస్ స్టేషన్ పరిధిలో వెలుగులోకి వచ్చింది. బాధితుడి ఫిర్యాదు మేరకు పోలీసులు కేసు నమోదు చేసి దర్యాప్తు చేపట్టారు.

పోలీసుల వివరాల ప్రకారం.. నిజామాబాద్ నగరంలోని హమాల్వాడీకి చెందిన రమేష్‌కు శ్రీనివాస్ అనే వ్యక్తి గతంలో రూ.1.30 లక్షలు అప్పుగా తీసుకున్నాడు. చాలా రోజులైనా అప్పు తిరిగి చెల్లించకపోవడంతో రమేష్ పలుమార్లు డబ్బులు ఇవ్వాలని కోరాడు.

దీంతో శ్రీనివాస్ కొత్త నాటకానికి తెరలేపాడు. తనకు గుప్తనిధి దొరికిందని, అందులో బంగారు రాళ్లు లభించాయని, వాటినే అప్పుకు బదులుగా ఇస్తానని రమేష్‌ను నమ్మించాడు. అంతేకాదు, ఆ బంగారు రాళ్లను తీసుకురావాలంటే డిచ్‌పల్లి మండలం ఘన్‌పూర్‌కు రావాలని, మరో రూ.32 వేల నగదు కూడా తీసుకురావాలని చెప్పాడు.

శ్రీనివాస్ మాటలు నమ్మిన రమేష్ అతను సూచించిన ప్రదేశానికి వెళ్లి రూ.32 వేల నగదు ఇచ్చాడు. అనంతరం నాలుగు బంగారు రాళ్లుగా చెప్పిన వస్తువులను స్వీకరించాడు. అయితే వాటిపై అనుమానం రావడంతో పరిశీలించగా అవి అసలు బంగారం కాదని, సాధారణ కంకర రాళ్లపై బంగారం రంగు పూత మాత్రమే పూసినట్లు గుర్తించాడు.

తాను మోసపోయానని గ్రహించిన రమేష్ వెంటనే డిచ్‌పల్లి పోలీసులను ఆశ్రయించి ఫిర్యాదు చేశాడు. కేసు నమోదు చేసిన పోలీసులు నిందితుడిని గుర్తించే పనిలో నిమగ్నమయ్యారు. ఘటనకు సంబంధించిన అన్ని కోణాల్లో దర్యాప్తు కొనసాగుతోంది.

ఈ సందర్భంగా గుప్తనిధులు, బంగారం పేరుతో మోసాలకు పాల్పడుతున్న వారి పట్ల ప్రజలు అప్రమత్తంగా ఉండాలని పోలీసులు హెచ్చరించారు. ఎలాంటి అనుమానాస్పద ఆఫర్లు వచ్చినా పూర్తిగా ధృవీకరించుకున్న తర్వాతే నమ్మాలని సూచించారు.