"ఆ సినిమా తీసినందుకు నాకే నేను నచ్చలేదు".. కృష్ణవంశీ భావోద్వేగ వ్యాఖ్యలు

క్రియేటివ్ డైరెక్టర్ కృష్ణవంశీ తాజాగా ఇచ్చిన ఇంటర్వ్యూలో తన సినీ కెరీర్‌కు సంబంధించిన ఆసక్తికర విషయాలను పంచుకున్నారు. ముఖ్యంగా తన కెరీర్‌లోని కొన్ని సినిమాల గురించి మాట్లాడుతూ చేసిన వ్యాఖ్యలు సోషల్ మీడియాలో వైరల్‌గా మారాయి.

'మొగుడు' సినిమా తన జీవితంలో అత్యంత చేదు అనుభవమని కృష్ణవంశీ అన్నారు. "ఆ సినిమా నాకు నచ్చలేదు.. ఆ సమయంలో నాకే నేను నచ్చలేదు" అంటూ భావోద్వేగానికి గురయ్యారు. ఒక వ్యక్తి చేసిన మోసం కారణంగా ఇష్టం లేకపోయినా ఆ చిత్రాన్ని పూర్తి చేయాల్సి వచ్చిందని, 'మొగుడు', 'పైసా' సినిమాలు తన కెరీర్‌లో అత్యంత నిరాశ కలిగించిన చిత్రాలని వెల్లడించారు.

జూనియర్ ఎన్టీఆర్ గురించి మాట్లాడుతూ 'రాఖీ' సినిమా క్లైమాక్స్‌లో దాదాపు పది నిమిషాల డైలాగ్‌ను ఒక్కసారే చెప్పి అందరినీ ఆశ్చర్యపరిచారని కొనియాడారు. మహేష్ బాబు, ప్రకాష్ రాజ్‌లకు కూడా అద్భుతమైన మెమరీ పవర్ ఉందని, అయితే ఎన్టీఆర్ స్థాయి జ్ఞాపకశక్తి చాలా అరుదుగా కనిపిస్తుందని చెప్పారు.

'అంతఃపురం' సినిమా విషయానికొస్తే మొదట సౌందర్యను హీరోయిన్‌గా అనుకోలేదని, కానీ షూటింగ్ ప్రారంభమైన రెండు రోజుల్లోనే ఆమె నటన చూసి తన అభిప్రాయం పూర్తిగా మారిపోయిందని తెలిపారు. ఆ పాత్రను సౌందర్య కంటే బాగా ఎవరూ చేయలేరని అప్పుడే అర్థమైందని కృష్ణవంశీ పేర్కొన్నారు.