ముంబై ఈవెంట్‌లో శ్రీలీలకు అవమానం..

ముంబైలో జరిగిన అంతర్జాతీయ యోగా దినోత్సవ వేడుకల్లో టాలీవుడ్ స్టార్ హీరోయిన్ శ్రీలీలకు సంబంధించిన ఓ వీడియో ఇప్పుడు సోషల్ మీడియాలో తీవ్ర చర్చనీయాంశంగా మారింది. మహారాష్ట్ర సీఎం దేవేంద్ర ఫడ్నవీస్ సతీమణి అమృత ఫడ్నవీస్ ప్రవర్తించిన తీరు వివాదానికి దారితీసిందని నెటిజన్లు అభిప్రాయపడుతున్నారు.

అంతర్జాతీయ యోగా దినోత్సవం సందర్భంగా ముంబైలో నిర్వహించిన ఈ ప్రత్యేక కార్యక్రమంలో అమృత ఫడ్నవీస్, బాలీవుడ్ నటుడు షాహిద్ కపూర్, టాలీవుడ్ హీరోయిన్ శ్రీలీల సహా పలువురు ప్రముఖులు పాల్గొన్నారు. యోగా ప్రాముఖ్యతను వివరిస్తూ జరిగిన ఈ కార్యక్రమం ఘనంగా ముగిసినప్పటికీ, అనంతరం జరిగిన ఫోటో సెషన్ ఇప్పుడు హాట్ టాపిక్‌గా మారింది.

కార్యక్రమం ముగిసిన తర్వాత అమృత ఫడ్నవీస్, ఆమె కుమార్తెతో పాటు శ్రీలీల కూడా కలిసి మీడియా ఫోటోగ్రాఫర్లకు ఫోజులిచ్చారు. అయితే కొందరు జర్నలిస్టులు కేవలం అమృత ఫడ్నవీస్, ఆమె కుమార్తె ఫొటోలు మాత్రమే కావాలని కోరినట్లు సమాచారం.

ఈ సమయంలో అమృత ఫడ్నవీస్, పక్కనే ఉన్న శ్రీలీలకు చేతి వేళ్లతో సైగ చేస్తూ కొద్దిగా పక్కకు జరగాలని సూచించిన దృశ్యాలు వీడియోలో కనిపించడంతో, ఈ ఘటన సోషల్ మీడియాలో వైరల్‌గా మారింది. ఆ సమయంలో శ్రీలీల కాస్త ఆశ్చర్యానికి గురైనట్లు కనిపించడంతో నెటిజన్లు భిన్నాభిప్రాయాలు వ్యక్తం చేస్తున్నారు.

కొంతమంది నెటిజన్లు ఒక స్టార్ హీరోయిన్‌తో మరింత గౌరవంగా వ్యవహరించాల్సిందని విమర్శలు చేస్తుండగా, మరికొందరు మాత్రం ఇది కేవలం ఫోటో సెషన్ అవసరాల నేపథ్యంలో జరిగిన సాధారణ ఘటనేనని అభిప్రాయపడుతున్నారు.

ఇదిలా ఉంటే, శ్రీలీల ప్రస్తుతం తెలుగు, తమిళం, హిందీ భాషల్లో వరుస ప్రాజెక్టులతో దూసుకుపోతోంది. ‘కిస్’ సినిమాతో ఎంట్రీ ఇచ్చిన ఆమె ‘పెళ్లి సందడి’, ‘ధమాకా’, ‘భగవంత్ కేసరి’, ‘గుంటూరు కారం’, ‘స్కంద’ వంటి సినిమాలతో స్టార్ హీరోయిన్‌గా గుర్తింపు సంపాదించుకుంది. అలాగే ‘పుష్ప-2’ స్పెషల్ సాంగ్‌తో దేశవ్యాప్తంగా మరింత క్రేజ్ తెచ్చుకుంది.

ఈ ఘటన నేపథ్యంలో సోషల్ మీడియాలో పెద్ద ఎత్తున చర్చ కొనసాగుతోంది. అయితే దీనిపై అమృత ఫడ్నవీస్ లేదా సంబంధిత వర్గాల నుంచి ఇంకా అధికారిక స్పందన రాలేదు.మరి ఈ వివాదం ఎటువంటి మలుపు తిరుగుతుందో చూడాలి.