బండి భగీరథ్‌కు బెయిల్.. పోక్సో కేసులో షరతులతో విడుదలకు గ్రీన్ సిగ్నల్

పోక్సో కేసులో అరెస్టై నెల రోజులకు పైగా జైలులో ఉన్న బండి భగీరథ్‌కు న్యాయస్థానంలో ఊరట లభించింది. మేడ్చల్-మల్కాజిగిరి జిల్లా పరిధిలో నమోదైన కేసులో మల్కాజిగిరి జిల్లా కోర్టు శనివారం షరతులతో కూడిన బెయిల్ మంజూరు చేసింది. ఇరుపక్షాల న్యాయవాదుల వాదనలు విన్న అనంతరం న్యాయమూర్తి ఈ మేరకు ఉత్తర్వులు జారీ చేశారు. దీంతో భగీరథ్ త్వరలో జైలు నుంచి విడుదల కానున్నారు.

ఈ కేసు తెలంగాణ రాజకీయాల్లో తీవ్ర చర్చకు దారితీసిన విషయం తెలిసిందే. మే 2026లో హైదరాబాద్‌లోని పేట్ బషీరాబాద్ పోలీస్ స్టేషన్‌లో 17 ఏళ్ల మైనర్ బాలిక తల్లి ఇచ్చిన ఫిర్యాదు మేరకు బండి భగీరథ్‌పై కేసు నమోదైంది. గత ఆరు నెలలుగా తన కుమార్తెను పెళ్లి చేసుకుంటానని నమ్మించి మానసికంగా వేధించాడని, మొయినాబాద్‌లోని ఓ ఫామ్‌హౌస్‌లో మద్యం తాగించి అసభ్యంగా ప్రవర్తించాడని ఫిర్యాదులో ఆరోపించారు. దీంతో పోలీసులు పోక్సో చట్టం సెక్షన్ 11 కింద కేసు నమోదు చేశారు.

అయితే కేసు నమోదు కావడానికి ముందు భగీరథ్ కూడా కరీంనగర్ టూ టౌన్ పోలీస్ స్టేషన్‌లో సదరు బాలిక కుటుంబంపై ఫిర్యాదు చేశారు. తనను తప్పుడు కేసులో ఇరికిస్తామని బెదిరిస్తూ రూ.5 కోట్లు డిమాండ్ చేశారని, డబ్బుల కోసం బ్లాక్‌మెయిల్ చేస్తున్నారని ఆరోపించారు. ఈ మేరకు బాలిక కుటుంబంపై ఎక్స్‌టార్షన్ కేసు కూడా నమోదైంది.

కేసు తీవ్రత దృష్ట్యా పోలీసులు ప్రత్యేక దర్యాప్తు చేపట్టారు. ముందస్తు బెయిల్ కోసం భగీరథ్ తెలంగాణ హైకోర్టును ఆశ్రయించినప్పటికీ, కోర్టు బెయిల్ నిరాకరించింది. అనంతరం మే 16న పోలీసులు ఆయనను నార్సింగి సమీపంలో అదుపులోకి తీసుకుని కోర్టులో హాజరుపరచగా, జ్యుడీషియల్ రిమాండ్ విధించారు. అప్పటి నుంచి ఆయన చర్లపల్లి జైలులో ఉన్నారు.

తాజాగా జిల్లా కోర్టులో బెయిల్ పిటిషన్‌పై విచారణ జరిగింది. భగీరథ్ తరపు న్యాయవాదులు ఆయనకు ప్రత్యక్ష ప్రమేయం లేదని, దర్యాప్తునకు పూర్తిగా సహకరిస్తారని వాదించారు. సాక్ష్యాలను ప్రభావితం చేసే అవకాశం లేదని పేర్కొన్నారు. మరోవైపు ప్రాసిక్యూషన్ తమ వాదనలు వినిపించింది.

ఇరువర్గాల వాదనలను పరిశీలించిన కోర్టు చివరికి షరతులతో కూడిన బెయిల్ మంజూరు చేసింది. కోర్టు విధించిన నిబంధనలను పాటిస్తూ దర్యాప్తునకు సహకరించాలని ఆదేశించింది. దీంతో బండి భగీరథ్ విడుదలకు మార్గం సుగమమైంది.