"మై పర్సన్" అంటూ ఫోటోలు షేర్ చేసిన అర్షదీప్.. బాలీవుడ్ బ్యూటీతో యూకే వెకేషన్ వైరల్

టీమిండియా స్టార్ పేసర్ అర్షదీప్ సింగ్ తాజాగా సోషల్ మీడియాలో చేసిన ఒక పోస్ట్ అభిమానులను ఆశ్చర్యానికి గురిచేసింది. బాలీవుడ్ నటి  సమ్రీన్ కౌర్ తో కలిసి యూకేలో వెకేషన్ ఎంజాయ్ చేస్తున్న ఫోటోలను షేర్ చేసిన అర్షదీప్.. వాటికి "My Person" అంటూ హార్ట్ ఎమోజీతో క్యాప్షన్ ఇవ్వడంతో ఇద్దరి మధ్య ప్రేమాయణంపై మళ్లీ చర్చ మొదలైంది. అధికారికంగా తమ రిలేషన్‌షిప్ గురించి ఎలాంటి ప్రకటన చేయకపోయినా.. ఈ పోస్టు ప్రస్తుతం సోషల్ మీడియాలో వైరల్‌గా మారింది.

ఐర్లాండ్, ఇంగ్లాండ్ వైట్‌బాల్ పర్యటనలు ముగిసిన తర్వాత వచ్చిన విరామాన్ని అర్షదీప్ యునైటెడ్ కింగ్‌డమ్‌లో గడుపుతున్నాడు. ఈ వెకేషన్‌లో సమ్రీన్ కౌర్ కూడా అతనితో కలిసి కనిపించడం అభిమానుల్లో ఆసక్తిని రేకెత్తించింది. ఫోటోల్లో ఇద్దరూ ఎంతో సన్నిహితంగా కనిపించడంతో డేటింగ్ రూమర్లకు మరింత బలం చేకూరింది.

వాస్తవానికి ఐపీఎల్ 2026 సీజన్ సమయంలోనే అర్షదీప్, సమ్రీన్ కలిసి పలు సందర్భాల్లో కనిపించారు. అప్పటి నుంచే వీరిద్దరూ ప్రేమలో ఉన్నారనే ప్రచారం మొదలైంది. ఇటీవల సమ్రీన్ కూడా తన ఇన్‌స్టాగ్రామ్ స్టోరీలో అర్షదీప్‌తో కలిసి ఒకే డిజైన్‌లో ఉన్న గోల్డ్ పెండెంట్లు ధరించిన ఫోటోను షేర్ చేయడంతో ఆ వార్తలకు మరింత ఊతమిచ్చింది. ఇప్పుడు అర్షదీప్ స్వయంగా "My Person" అంటూ ఫోటోలు పంచుకోవడంతో ఈ జోడీ సోషల్ మీడియాలో ట్రెండింగ్‌గా మారింది.

ఇక క్రికెట్ విషయానికి వస్తే.. ఐపీఎల్ 2026లో పంజాబ్ కింగ్స్ ఆశించిన ఫలితాలు సాధించలేక ప్లేఆఫ్స్‌కు దూరమైంది. ఆ సమయంలో అర్షదీప్ సోషల్ మీడియాలో రీల్స్ పోస్ట్ చేయడంపై విమర్శలు కూడా ఎదుర్కొన్నాడు. మ్యాచ్‌లపై దృష్టి పెట్టకుండా సోషల్ మీడియాలో ఎక్కువ సమయం గడుపుతున్నాడంటూ కొందరు నెటిజన్లు ట్రోల్ చేశారు.

ఇటీవల ఇంగ్లాండ్‌తో జరిగిన వన్డే సిరీస్‌లో అర్షదీప్ ఆశించిన స్థాయిలో రాణించలేకపోయాడు. ముఖ్యంగా నిర్ణయాత్మక మూడో వన్డేలో వికెట్ లేకుండా 72 పరుగులు ఇవ్వడంతో విమర్శలు ఎదుర్కొన్నాడు. ఆ సిరీస్‌ను భారత్ 1-2తో కోల్పోయింది. అయితే టీ20 సిరీస్‌లో మాత్రం నాలుగు వికెట్లు తీసి భారత జట్టులో అత్యధిక వికెట్లు పడగొట్టిన బౌలర్‌గా నిలిచాడు.

ఇంగ్లాండ్ పర్యటన అనంతరం జింబాబ్వేతో జరిగిన టీ20 సిరీస్‌కు అర్షదీప్‌కు విశ్రాంతి ఇచ్చారు. అతడు జట్టులో లేకపోయినా.. శ్రేయస్ అయ్యర్ సారథ్యంలో భారత్ 3-0తో సిరీస్‌ను క్లీన్‌స్వీప్ చేసి విజయాన్ని నమోదు చేసింది. ఇదే శ్రేయస్ అయ్యర్‌కు టీ20 కెప్టెన్‌గా తొలి సిరీస్ విజయం కావడం విశేషం.