15 ఏళ్లకే ప్రపంచ రికార్డు.. సచిన్, అఫ్రీదీ రికార్డులను బద్దలు కొట్టిన వైభవ్ సూర్యవంశీ

భారత యువ సంచలనం వైభవ్ సూర్యవంశీ అంతర్జాతీయ క్రికెట్‌లో అరుదైన ఘనత సాధించాడు. జింబాబ్వేతో హరారేలో జరిగిన తొలి టీ20 మ్యాచ్‌లో కేవలం 15 ఏళ్ల 118 రోజుల వయస్సులోనే అర్ధశతకం పూర్తి చేసి ప్రపంచ రికార్డు నెలకొల్పాడు. ఫుల్ మెంబర్ దేశాల తరపున అంతర్జాతీయ క్రికెట్‌లో అత్యంత పిన్న వయస్సులో హాఫ్ సెంచరీ చేసిన బ్యాటర్‌గా చరిత్రలో నిలిచాడు.

ఈ ప్రదర్శనతో భారత దిగ్గజం సచిన్ టెండూల్కర్, పాకిస్థాన్ మాజీ ఆటగాడు షాహిద్ అఫ్రీది పేరిట ఉన్న రికార్డులను వైభవ్ అధిగమించాడు. సచిన్ 16 ఏళ్ల 213 రోజుల వయస్సులో, అఫ్రీది 16 ఏళ్ల 214 రోజుల వయస్సులో ఈ ఘనత సాధించగా.. వైభవ్ మరింత చిన్న వయస్సులోనే ఆ మైలురాయిని అందుకున్నాడు.

అంతర్జాతీయ క్రికెట్ మొత్తంగా పరిశీలించినా, అత్యంత పిన్న వయస్సులో హాఫ్ సెంచరీ చేసిన ఆటగాళ్ల జాబితాలో వైభవ్ అగ్రస్థానంలో నిలిచాడు. అసోసియేట్ దేశాల ఆటగాడు కుశాల్ మల్లా తర్వాత ఈ ఘనత సాధించిన రెండో టీనేజ్ క్రికెటర్ అయినప్పటికీ, ఫుల్ మెంబర్ దేశాల విభాగంలో మాత్రం తొలి స్థానాన్ని దక్కించుకున్నాడు.

మ్యాచ్‌లో జింబాబ్వే బౌలర్లపై ప్రారంభం నుంచే దూకుడుగా ఆడిన వైభవ్ కేవలం 18 బంతుల్లోనే అర్ధశతకం పూర్తి చేశాడు. తన ఇన్నింగ్స్‌లో 4 సిక్సర్లు, 4 ఫోర్లు బాదుతూ ప్రేక్షకులను అలరించాడు. అర్ధశతకం పూర్తయిన వెంటనే ఔటైనా, తన మెరుపు ఇన్నింగ్స్‌తో మ్యాచ్‌కే హైలైట్‌గా నిలిచాడు.

ఇంగ్లాండ్‌తో జరిగిన సిరీస్‌లో ఆశించిన స్థాయిలో రాణించలేకపోయిన వైభవ్.. జింబాబ్వేపై మాత్రం అసాధారణ బ్యాటింగ్‌తో తన ప్రతిభను ప్రపంచానికి మరోసారి చాటిచెప్పాడు. చిన్న వయస్సులోనే చరిత్ర సృష్టిస్తూ భారత క్రికెట్‌కు మరో భవిష్యత్ స్టార్‌గా ఎదుగుతున్నాడనే సంకేతాలు ఇచ్చాడు.