వైభవ్ సూర్యవంశీ కోసం ప్రత్యేక డ్రెస్సింగ్ రూమ్

భారత క్రికెట్‌లో మరో సంచలన అధ్యాయం ఆరంభం కానుంది. ఐపీఎల్‌లో అద్భుత ప్రదర్శనతో దేశవ్యాప్తంగా గుర్తింపు తెచ్చుకున్న 15 ఏళ్ల యువ బ్యాటర్ వైభవ్ సూర్యవంశీ త్వరలోనే టీమిండియా తరపున అంతర్జాతీయ క్రికెట్‌లో అరంగేట్రం చేయబోతున్నాడు.

ఐర్లాండ్‌తో జరగనున్న టీ20 సిరీస్‌లో లేదా జూలై 1 నుంచి ప్రారంభమయ్యే ఇంగ్లాండ్ సిరీస్‌లో వైభవ్ భారత జట్టు తరపున బరిలోకి దిగే అవకాశాలు ఎక్కువగా కనిపిస్తున్నాయి. దీంతో అత్యంత పిన్న వయసులో భారత జట్టుకు ప్రాతినిధ్యం వహించిన ఆటగాళ్ల జాబితాలో అతను చోటు సంపాదించనున్నాడు.

అయితే యూకేలో అమల్లో ఉన్న చైల్డ్ సేఫ్‌గార్డింగ్ చట్టాల కారణంగా వైభవ్‌కు ప్రత్యేక డ్రెస్సింగ్ రూమ్ ఏర్పాటు చేయనున్నారు. 16 ఏళ్లలోపు మైనర్ క్రీడాకారులు పెద్దలతో కలిసి చేంజింగ్ రూమ్ ఉపయోగించకూడదనే నిబంధనల మేరకు ప్రతి స్టేడియంలో అతనికి ప్రత్యేక గది కేటాయించనున్నారు. మ్యాచ్‌లు, టీమ్ మీటింగ్స్ సమయంలో మాత్రం అతను జట్టుతో కలిసి ఉండొచ్చు.

వైభవ్ అరంగేట్రం చేస్తే భారత క్రికెట్ చరిత్రలో అత్యంత పిన్న వయసులో అంతర్జాతీయ క్రికెట్ ఆడిన ఆటగాళ్లలో ఒకరిగా నిలుస్తాడు. అలాగే పూర్తి స్థాయి సభ్య దేశం తరఫున ఆడిన అత్యంత పిన్న వయస్కుల జాబితాలో కూడా చోటు దక్కించుకోనున్నాడు.

ఐపీఎల్ 2026లో అద్భుత బ్యాటింగ్‌తో అందరి దృష్టిని ఆకర్షించిన వైభవ్, ఇండియా-ఏ తరఫున కూడా రికార్డు స్థాయి ప్రదర్శనలు చేశాడు. తన దూకుడు ఆటతీరుతో భవిష్యత్ స్టార్‌గా ఇప్పటికే గుర్తింపు పొందాడు.

ఇక ఈ కీలక పర్యటనలో వైభవ్‌కు తోడుగా ఉండేందుకు అతని తల్లిదండ్రులకు కూడా బీసీసీఐ ప్రత్యేక అనుమతి ఇచ్చినట్లు సమాచారం. ప్రపంచవ్యాప్తంగా క్రికెట్ అభిమానులంతా ఇప్పుడు ఈ యువ సంచలనం అరంగేట్రం కోసం ఆసక్తిగా ఎదురుచూస్తున్నారు.