గుంటూరు మహిళ ఘటనపై చంద్రబాబు సీరియస్.. టీడీపీ నేత సస్పెండ్, 9 మందిపై కేసు

గుంటూరులో మహిళపై జరిగిన అమానుష ఘటనపై ఆంధ్రప్రదేశ్ ముఖ్యమంత్రి చంద్రబాబు నాయుడు తీవ్ర ఆగ్రహం వ్యక్తం చేశారు. మహిళను వివస్త్రను చేసి దాడి చేసిన ఘటనలో ఇప్పటికే కేసు నమోదు చేసి నిందితులను అరెస్ట్ చేసినట్లు తెలిపారు. ఈ ఘటనలో ఆరోపణలు ఎదుర్కొంటున్న టీడీపీ నేత మల్లెల రమణమూర్తిని పార్టీ ప్రాథమిక సభ్యత్వం నుంచి తక్షణమే సస్పెండ్ చేసినట్లు ప్రకటించారు. మహిళల భద్రత విషయంలో ఎలాంటి రాజీ ఉండదని, రాజకీయ పలుకుబడి ఉన్నా చట్టం ముందు అందరూ సమానమేనని స్పష్టం చేశారు.

ఈ నెల 15న గుంటూరులోని కృష్ణబాబు కాలనీలో నీటి మోటార్ విషయంలో జరిగిన వాగ్వాదం దాడికి దారితీసింది. బాధిత మహిళపై మల్లెల రమణమూర్తి, అతని సోదరి మాధవి సహా పలువురు దాడి చేసి దుస్తులు చించారని ఆరోపణలు ఉన్నాయి. స్థానిక మహిళలు అడ్డుకుని బాధితురాలికి సహాయం చేశారు. బాధితురాలి ఫిర్యాదు మేరకు పోలీసులు మూర్తి, అతని సోదరి సహా మొత్తం 9 మందిపై కేసు నమోదు చేసి అరెస్ట్ చేశారు.

ఈ ఘటనపై మంత్రి నారా లోకేష్ కూడా తీవ్ర ఆగ్రహం వ్యక్తం చేశారు. మహిళలను అవమానించిన వారిపై కఠిన చర్యలు తప్పవని, చట్టం ముందు ఎవరైనా ఒకటేనని చెప్పారు. హోంమంత్రి వంగలపూడి అనిత గుంటూరు ఎస్పీతో మాట్లాడి కేసు పురోగతిని తెలుసుకున్నారు. నిందితులపై కఠిన చర్యలతో పాటు, నిర్లక్ష్యం వహించిన పోలీసులపైనా చర్యలు తీసుకోవాలని ఆదేశించారు.

స్థానిక ఎమ్మెల్యే గళ్ళా మాధవి కూడా ఘటనను ఖండించారు. బాధితురాలు తనను కలిసిన వెంటనే పోలీసులతో మాట్లాడి కేసు నమోదు చేయించినట్లు తెలిపారు. మహిళల గౌరవాన్ని దెబ్బతీసే చర్యలను ఎట్టి పరిస్థితుల్లోనూ సహించబోమని, బాధిత కుటుంబానికి పూర్తిస్థాయిలో అండగా ఉంటానని హామీ ఇచ్చారు.