నకిలీ టీటీడీ ఐడీతో భక్తులను టార్గెట్ చేసిన అంతర్రాష్ట్ర ముఠా అరెస్ట్

తిరుమలకు వచ్చే భక్తుల అమాయకత్వాన్ని ఆసరాగా చేసుకుని మోసాలకు పాల్పడుతున్న అంతర్రాష్ట్ర ముఠాను తిరుమల టూ టౌన్ పోలీసులు అదుపులోకి తీసుకున్నారు. రాంభగీచ కార్ పార్కింగ్ సమీపంలో నిర్వహించిన ప్రత్యేక తనిఖీల్లో ముగ్గురు అనుమానితులను గుర్తించిన పోలీసులు, వారి ప్రవర్తనపై అనుమానం రావడంతో విచారణ చేపట్టగా అసలు వ్యవహారం బయటపడింది.

నిందితులు మహారాష్ట్రకు చెందిన బాలాజీ అకాడే, కీర్తి రెడ్డి, అప్పాషా మానేలుగా గుర్తించారు. వీరు తిరుమలకు భారీగా వచ్చే భక్తుల రద్దీని లక్ష్యంగా చేసుకుని బస్ స్టాండ్లు, ఉచిత బస్సులు, క్యూ లైన్లు, రద్దీ ప్రాంతాల్లో జేబుదొంగతనాలు, బ్యాగులు కోసి నగదు, విలువైన వస్తువులు అపహరించేవారని పోలీసులు వెల్లడించారు.

ఈ ముఠా మోసాలకు మరింత విశ్వసనీయత కల్పించేందుకు నిందితురాలు కీర్తి రెడ్డి నకిలీ టీటీడీ ఉద్యోగి గుర్తింపు కార్డును తయారు చేసుకుని మెడలో ధరించేదని విచారణలో తేలింది. ఆ ఐడీని చూపిస్తూ తాను టీటీడీ ఉద్యోగినినని భక్తులను నమ్మించి, ప్రత్యేక దర్శనం, వసతి గదులు, వీఐపీ సేవలు ఇప్పిస్తానంటూ ఆన్‌లైన్ చెల్లింపుల ద్వారా డబ్బులు వసూలు చేసినట్లు పోలీసులు గుర్తించారు.

సోదాల్లో నిందితుల వద్ద నుంచి నగదు, దొంగిలించిన పర్సు, డ్రైవింగ్ లైసెన్స్, పాన్ కార్డు, మోటార్ సైకిల్ రిజిస్ట్రేషన్ సర్టిఫికేట్, నకిలీ టీటీడీ ఐడీ కార్డు, రెండు స్మార్ట్‌ఫోన్లు, ఒక కీప్యాడ్ ఫోన్, బ్యాగులు కోయడానికి ఉపయోగించే కట్టర్, కత్తి, బ్లేడ్‌లు, అలాగే భక్తుల దృష్టి మరల్చేందుకు వినియోగించే నకిలీ నగలను స్వాధీనం చేసుకున్నారు.

నిందితులపై భారతీయ న్యాయ సంహిత (BNS)లోని సంబంధిత సెక్షన్ల కింద కేసు నమోదు చేసి న్యాయస్థానం ముందు హాజరుపరచనున్నట్లు పోలీసులు తెలిపారు. స్వాధీనం చేసుకున్న వస్తువులను చట్టపరమైన ప్రక్రియలో భాగంగా జప్తు చేశారు.

ఈ ఘటన నేపథ్యంలో తిరుమల పోలీసులు భక్తులకు అప్రమత్తంగా ఉండాలని సూచించారు. దర్శనం, వసతి లేదా ప్రత్యేక టికెట్లు ఇప్పిస్తామని చెప్పే వ్యక్తులను నమ్మవద్దని, అధికారిక టీటీడీ కౌంటర్లు లేదా అధికారిక వెబ్‌సైట్ ద్వారానే సేవలను పొందాలని సూచించారు. ఎవరైనా అనుమానాస్పదంగా కనిపించినా లేదా మోసానికి గురైనట్లు అనిపించినా వెంటనే సమీప పోలీసులను సంప్రదించాలని విజ్ఞప్తి చేశారు.