మళ్లీ అదే పని చేసిన జీ.వి. ప్రకాష్ . . నువ్వు మారవు సామి!

దక్షిణాది స్టార్ మ్యూజిక్ డైరెక్టర్, నటుడు జీ.వి. ప్రకాష్ కుమార్ మరోసారి తన గొప్ప మనసును చాటుకున్నారు. గతంలో సోషల్ మీడియా మోసగాళ్ల చేతిలో మోసపోయినా.. తన మానవత్వాన్ని మాత్రం ఏమాత్రం మార్చుకోలేదు. తాజాగా ఓ నెటిజన్ కుటుంబ సభ్యుడి సర్జరీ కోసం ఆర్థిక సహాయం కోరగా.. వెంటనే స్పందించి రూ.50 వేల సాయం అందించారు.

జీ.వి. ప్రకాష్ సినీ పరిశ్రమలో సంగీత దర్శకుడిగానే కాకుండా.. సామాజిక సేవా కార్యక్రమాల్లోనూ చురుగ్గా పాల్గొంటూ ఉంటారు. సోషల్ మీడియా ద్వారా సహాయం కోరిన వారికి తన వంతు చేయూత అందించడం ఆయనకు కొత్తేమీ కాదు. అయితే గతంలో ఓ వ్యక్తి తన తల్లి మరణించిందంటూ తప్పుడు సమాచారం ఇచ్చి రూ.20 వేల సహాయం పొందాడు. తర్వాత అది ఫేక్ అకౌంట్ అని తెలిసి జీవీ ప్రకాష్ నిరాశకు గురయ్యారు.

అయితే ఆ ఘటనను మనసులో పెట్టుకోకుండా మరోసారి తన మంచి మనసును చాటుకున్నారు. ఇటీవల ఓ నెటిజన్ తన కుటుంబ సభ్యుడికి అత్యవసర శస్త్రచికిత్స అవసరమని, ఆర్థికంగా ఇబ్బందుల్లో ఉన్నామని ఎక్స్ వేదికగా విజ్ఞప్తి చేశాడు. ఈ పోస్టును చూసిన నెటిజన్లు జీ.వి. ప్రకాష్‌ను ట్యాగ్ చేయడంతో ఆయన వెంటనే స్పందించారు.సదరు వ్యక్తికి రూ.50 వేల ఆర్థిక సహాయం పంపించిన జీ.వి. ప్రకాష్.. ట్రాన్సాక్షన్ స్క్రీన్ షాట్‌ను కూడా షేర్ చేశారు. "ఇది నా తరఫున చిన్న సహాయం మాత్రమే. ఈసారి మీరు చెప్పింది నిజమేనని నమ్ముతున్నాను" అంటూ చేసిన కామెంట్ ప్రస్తుతం సోషల్ మీడియాలో వైరల్‌గా మారింది.

ఒకసారి మోసపోయినా.. అవసరంలో ఉన్న వారికి సాయం చేయడం ఆపకపోవడంపై నెటిజన్లు జీ.వి. ప్రకాష్‌ను ప్రశంసలతో ముంచెత్తుతున్నారు. "రియల్ హీరో", "మానవత్వానికి నిలువెత్తు నిదర్శనం", "ఇలాంటి మనసున్న సెలబ్రిటీలు చాలా అరుదు" అంటూ సోషల్ మీడియాలో కామెంట్లు చేస్తున్నారు.

మరోసారి తన దాతృత్వంతో అభిమానుల హృదయాలను గెలుచుకున్న జీ.వి. ప్రకాష్.. డబ్బు కంటే మానవత్వమే గొప్పదని నిరూపించారని నెటిజన్లు అభిప్రాయపడుతున్నారు.