నన్ను పెళ్లి చేసుకోవాలంటే ఒక్క మెసేజ్ చేయండి.. హీరోయిన్ రేఖ వేదవ్యాస్ ఆసక్తికర వ్యాఖ్యలు

ఒకప్పుడు తెలుగు ప్రేక్షకులను తన అందం, అభినయంతో ఆకట్టుకున్న హీరోయిన్ రేఖ వేదవ్యాస్ చాలా కాలంగా సినిమాలకు దూరంగా ఉన్నారు. ఇటీవల ఓ ఇంటర్వ్యూలో పాల్గొన్న ఆమె తన వ్యక్తిగత జీవితం, ప్రేమ, వివాహంపై ఆసక్తికర విషయాలను పంచుకున్నారు. ప్రస్తుతం కూడా తాను సింగిల్‌గానే ఉన్నానని, బాలీవుడ్ నటుడు సల్మాన్ ఖాన్‌లాగే తాను కూడా పెళ్లి చేసుకోకుండా ఉండిపోతానేమోనని సరదాగా వ్యాఖ్యానించారు.

తనకు కాబోయే జీవిత భాగస్వామి గురించి మాట్లాడుతూ.. ఒకప్పుడు ఎన్నో అంచనాలు ఉండేవని, కానీ ఇప్పుడు అవేవీ లేవని చెప్పారు. అందంగా ఉండటం, ఎత్తు, రంగు వంటి విషయాల కంటే మంచి మనసు ఉండటం ముఖ్యమని అన్నారు. తనను నిజంగా ప్రేమించే వ్యక్తి అయితే చాలని, పరిపూర్ణమైన మనిషి ఎవరూ ఉండరని, తానూ అలాంటి వ్యక్తిని కాదని తెలిపారు.

తనను నిజంగా పెళ్లి చేసుకోవాలనుకునే వారు ఇన్‌స్టాగ్రామ్‌లోని anandam_rekha ఖాతాకు మెసేజ్ చేయవచ్చని రేఖ చెప్పారు. అయితే సరదా కోసం కాదు.. నిజంగా పెళ్లి చేసుకోవాలనే ఉద్దేశం ఉన్నవారు మాత్రమే సంప్రదించాలని స్పష్టం చేశారు.

ప్రేమ గురించి కూడా ఆమె తన అభిప్రాయాన్ని వెల్లడించారు. క్రష్, ఇన్ఫాట్యుయేషన్, ఆబ్సెషన్, నిజమైన ప్రేమ అన్నీ వేర్వేరు విషయాలని చెప్పారు. ఎలాంటి స్వార్థం లేకుండా, భవిష్యత్తును కలిసి నిర్మించాలనే ఆలోచనతో ఒకరిని అంగీకరించడమే నిజమైన ప్రేమ అని వివరించారు. ఎదుటివారి మంచి, చెడు రెండింటినీ అంగీకరించి జీవితాంతం తోడుగా నిలబడటమే ప్రేమకు అసలైన అర్థమని అన్నారు.

ఒక వ్యక్తి నిజంగా ప్రేమిస్తున్నాడో లేదో తెలుసుకోవాలంటే కొంత సమయం ఇవ్వాలని సూచించారు. సంతోష సమయంలో అందరూ ఉంటారని, కానీ కష్టకాలంలో తోడుగా నిలిచే వ్యక్తే నిజమైన భాగస్వామి అని చెప్పారు. ప్రేమలో మోసం చేసేవారికి కర్మ తప్పకుండా ఫలితం ఇస్తుందని, ప్రేమ విఫలమైందని ఆత్మహత్య వంటి నిర్ణయాలు తీసుకోవద్దని యువతకు సూచించారు.

తనకు చాలామంది ప్రేమను వ్యక్తం చేశారని, కానీ తాను మాత్రం ఎవరికి ముందుగా ప్రపోజ్ చేయలేదని రేఖ వెల్లడించారు. ఒకరిని ఇష్టపడినా చెప్పలేకపోయానని, బహుశా తిరస్కరిస్తారేమో అనే భయమే కారణమని అన్నారు. నిజంగా ప్రేమిస్తే ధైర్యంగా చెప్పాలని, సరైన సమయంలో కుటుంబ సభ్యులతో మాట్లాడి పెళ్లి చేసుకోవాలని యువతకు ఆమె సలహా ఇచ్చారు.