శ్రీవారికి నైవేద్యం ఎప్పుడు మొదలైంది?

తిరుమలలో భక్తులు స్వీకరించే ప్రతి ప్రసాదం వెనుక వేల సంవత్సరాల ఆధ్యాత్మిక సంప్రదాయం దాగి ఉంది. లడ్డూ, పులిహోర, దధ్యోదనం, చక్కెర పొంగలి వంటి ప్రతి ప్రసాదాన్ని ముందుగా శ్రీవారికి నైవేద్యంగా సమర్పించిన తర్వాతే భక్తులకు అందజేస్తారు. అందుకే తిరుమల ప్రసాదాన్ని సాధారణ ఆహారంగా కాకుండా శ్రీవారి అనుగ్రహంగా భావిస్తారు.

సనాతన ధర్మంలో నైవేద్యం అంటే భగవంతుడు ప్రసాదించిన ఆహారాన్ని కృతజ్ఞతతో తిరిగి ఆయనకే సమర్పించడం. అనంతరం ఆ దైవానుగ్రహాన్ని ప్రసాదంగా స్వీకరించడం. వేదాలు, పురాణాలు, ఆగమ శాస్త్రాలు ఈ సంప్రదాయాన్ని విశిష్టమైన దైవసేవగా పేర్కొన్నాయి.

పురాణాల్లోని శ్రీ వేంకటాచల మహాత్మ్యం ప్రకారం, స్వామివారి ఆజ్ఞతో తొండమాన్ చక్రవర్తి ఆలయ నిర్మాణం చేపట్టి నిత్యపూజలతో పాటు నైవేద్య సంప్రదాయాన్ని కూడా వ్యవస్థీకరించినట్లు పేర్కొనబడింది. అనంతరం తిరుమలలో వైఖానస ఆగమ సంప్రదాయం ప్రకారం నిత్యారాధనలు మరింత శాస్త్రబద్ధంగా కొనసాగాయి.

వైఖానస ఆగమం ప్రకారం ఏ సమయంలో ఏ నైవేద్యం సమర్పించాలి, ఏ సేవలో ఏ వంటకాలు ఉండాలి, ఏ మంత్రాలతో నివేదించాలి అనే విధానాలు స్పష్టంగా నిర్దేశించబడ్డాయి. అందుకే తిరుమలలో నైవేద్యం కేవలం వంటకం కాదు... అది శాస్త్రోక్తంగా జరిగే దైవారాధనలో అత్యంత ముఖ్యమైన భాగం.

వేల సంవత్సరాలుగా రాజులు మారినా, పాలనలు మారినా, కాలం మారినా శ్రీవారి నైవేద్య విధానంలో మాత్రం మార్పు రాలేదు. నేటికీ అదే ఆగమ నియమాలను అనుసరిస్తూ నైవేద్యాలు సమర్పించి, అనంతరం భక్తులకు ప్రసాదంగా అందజేస్తున్నారు. అందుకే తిరుమల ప్రసాదం భక్తుల దృష్టిలో కేవలం ఆహారం కాదు... భక్తి, సంప్రదాయం, దైవానుగ్రహానికి ప్రతీకగా నిలిచింది.