ఏపీలో రిలయన్స్ భారీ పెట్టుబడి?.. ఏలూరులో రూ.లక్ష కోట్ల కోల్ గ్యాసిఫికేషన్ ప్రాజెక్ట్ చర్చ

ఆంధ్రప్రదేశ్‌లో మరో భారీ పారిశ్రామిక పెట్టుబడిపై చర్చ జరుగుతోంది. రిలయన్స్ ఇండస్ట్రీస్ ఏలూరు జిల్లాలో అండర్‌గ్రౌండ్ కోల్ గ్యాసిఫికేషన్ ప్రాజెక్ట్‌ను ఏర్పాటు చేయడానికి సుమారు రూ.లక్ష కోట్ల పెట్టుబడి పెట్టే అవకాశాలపై కసరత్తు చేస్తున్నట్లు సమాచారం. ఈ ప్రాజెక్ట్ అమల్లోకి వస్తే దేశంలోనే తొలి అండర్‌గ్రౌండ్ కోల్ గ్యాసిఫికేషన్ ప్రాజెక్ట్‌గా నిలిచే అవకాశం ఉందని అధికార వర్గాల్లో చర్చ జరుగుతోంది.

ఇటీవల నిర్వహించిన ఈ-వేలంలో రిలయన్స్ సంస్థ ఏలూరు జిల్లా చింతలపూడి, రేచెర్ల బొగ్గు గనులను దక్కించుకుంది. ఈ ప్రాంతాల్లో భారీ స్థాయిలో బొగ్గు నిల్వలు ఉన్నట్లు అంచనా వేయగా, వాటిని సంప్రదాయ పద్ధతిలో తవ్వకుండా ఆధునిక కోల్ గ్యాసిఫికేషన్ సాంకేతికతతో వినియోగించే ప్రణాళికపై సంస్థ దృష్టి సారించినట్లు తెలుస్తోంది.

అధికారిక అంచనాల ప్రకారం చింతలపూడి బ్లాక్‌లో సుమారు 904.94 మిలియన్ టన్నుల జీ-12 రకం బొగ్గు, రేచెర్ల బ్లాక్‌లో 2,225.67 మిలియన్ టన్నుల జీ-13 రకం బొగ్గు నిల్వలు ఉన్నాయి. మొత్తం 3,130.61 మిలియన్ టన్నుల బొగ్గు నిల్వలను ఈ ప్రాజెక్ట్ ద్వారా వినియోగించే అవకాశం ఉందని భావిస్తున్నారు.

కోల్ గ్యాసిఫికేషన్ ప్రక్రియలో భూగర్భంలోనే బొగ్గును నియంత్రిత విధానంలో గ్యాస్‌గా మార్చి, ఆ సింథటిక్ గ్యాస్‌తో అమ్మోనియా, అమ్మోనియం నైట్రేట్ వంటి పారిశ్రామిక ఉత్పత్తులను తయారు చేయవచ్చు. ఈ ప్రాజెక్ట్‌ను 2029 నాటికి పూర్తి చేయాలనే లక్ష్యంతో ప్రణాళికలు రూపొందుతున్నట్లు సమాచారం.

ఈ ప్రాజెక్ట్ అమలైతే ప్రత్యక్షంగా, పరోక్షంగా వేలాది మందికి ఉపాధి అవకాశాలు లభించే అవకాశం ఉందని భావిస్తున్నారు. అయితే ఈ పెట్టుబడి, ప్రాజెక్ట్‌కు సంబంధించిన పూర్తి వివరాలు, అధికారిక ఆమోదాలు ఇంకా వెలువడాల్సి ఉంది.

మరోవైపు, రిలయన్స్ ఇప్పటికే ఆంధ్రప్రదేశ్‌లో గిగా-స్కేల్ ఆర్టిఫిషియల్ ఇంటెలిజెన్స్ డేటా సెంటర్ ఏర్పాటు చేయనున్నట్లు ప్రకటించింది. విజయనగరం జిల్లాలో రెండు దశల్లో రూ.1,08,010 కోట్ల పెట్టుబడితో 1.5 గిగావాట్ల సామర్థ్యం గల డేటా సెంటర్‌ను ఏర్పాటు చేయనున్న ప్రణాళిక కొనసాగుతోంది.