గేటెడ్ కమ్యూనిటీల్లో శోకమందిరాల అవసరం.నగరవాసులను ఆలోచింపజేస్తున్న మరణం

హైదరాబాద్ వంటి మహానగరాల్లో గేటెడ్ కమ్యూనిటీలు, హైరైజ్ అపార్ట్‌మెంట్ల సంస్కృతి వేగంగా పెరుగుతోంది. ఆధునిక సౌకర్యాలతో కూడిన ఈ నివాసాల్లో జీవితం ఎంతో సౌకర్యవంతంగా ఉన్నప్పటికీ, కుటుంబంలో ఎవరైనా మరణిస్తే అంతిమ సంస్కారాలకు ముందు నిర్వహించే సంప్రదాయ కార్యక్రమాలకు తగిన వసతులు లేకపోవడం ఇప్పుడు కొత్త సామాజిక సమస్యగా మారుతోంది.

ఈ అంశాన్ని ప్రముఖ జర్నలిస్టు శ్రీనివాసరావు సోషల్ మీడియా వేదికగా ప్రస్తావించడంతో విస్తృత చర్చకు దారితీసింది. ఇటీవల తన స్నేహితుడి కుటుంబంలో జరిగిన ఒక సంఘటనను ఉదాహరణగా చెబుతూ, గేటెడ్ కమ్యూనిటీల్లో భౌతికకాయానికి స్నానం చేయించడం, చివరి క్రియలు నిర్వహించడం వంటి కార్యక్రమాలకు సరైన స్థలం లేక కుటుంబ సభ్యులు తీవ్ర ఇబ్బందులు ఎదుర్కొంటున్నారని వివరించారు.

ఆయన వివరాల ప్రకారం, వృద్ధాప్యంతో మరణించిన తన స్నేహితుడి తల్లికి అంతిమ సంస్కారాల ముందు చేయాల్సిన సంప్రదాయ కార్యక్రమాలను ఇంటి బాల్కనీ, హాల్లోనే నిర్వహించాల్సి వచ్చింది. అపార్ట్‌మెంట్ ప్రాంగణంలో అందుకు ప్రత్యేక ఏర్పాట్లు లేకపోవడంతో కుటుంబ సభ్యులు అత్యంత భావోద్వేగ పరిస్థితుల్లోనే అన్ని కార్యక్రమాలను పూర్తి చేసి, అనంతరం భౌతికకాయాన్ని స్మశానానికి తరలించారు.

ఈ పోస్టుకు స్పందించిన పలువురు నెటిజన్లు కూడా తమ అనుభవాలను పంచుకున్నారు. అనేక అపార్ట్‌మెంట్ సముదాయాల్లో మరణించిన వ్యక్తి భౌతికకాయాన్ని ఎక్కువసేపు ఉంచేందుకు అనుమతి ఇవ్వడం లేదని, చివరి కార్యక్రమాలు నిర్వహించడానికి తగిన స్థలం లేక ఇబ్బందులు ఎదురవుతున్నాయని పేర్కొన్నారు. నగర జీవనశైలిలో ఇటువంటి సమస్యలు మరింత పెరుగుతున్నాయని అభిప్రాయపడ్డారు.

కొంతమంది నెటిజన్లు బెంగళూరులోని కొన్ని గేటెడ్ కమ్యూనిటీల్లో "మోక్ష రూమ్" పేరుతో ప్రత్యేక గదులను ఏర్పాటు చేస్తున్నట్లు తెలిపారు. అలాగే కొన్నిసేవా సంస్థలు మొబైల్ అంత్యక్రియల సేవలను అందిస్తూ, భౌతికకాయానికి స్నానం చేయించడం వంటి కార్యక్రమాలకు ప్రత్యేక వాహనాలను వినియోగిస్తున్నాయని వెల్లడించారు. ఇలాంటి సదుపాయాలు మరిన్ని నగరాల్లో అందుబాటులోకి రావాలని వారు సూచించారు.

రియల్ ఎస్టేట్ రంగం కూడా మారుతున్న సామాజిక అవసరాలను దృష్టిలో పెట్టుకుని కొత్త ఆలోచనలు చేయాల్సిన అవసరం ఉందని పలువురు అభిప్రాయపడుతున్నారు. కోట్ల రూపాయల విలువైన గేటెడ్ కమ్యూనిటీల్లో క్లబ్‌హౌస్‌లు, ఫంక్షన్ హాళ్లు, జిమ్‌లు, పార్కులు ఏర్పాటు చేస్తున్నట్లే, అత్యవసర పరిస్థితుల్లో కుటుంబాలకు ఉపయోగపడేలా చిన్న పరిమాణంలో ప్రత్యేక శోకమందిరాలు లేదా మోక్ష హాళ్లు ఏర్పాటు చేస్తే గౌరవప్రదంగా అంతిమ కార్యక్రమాలు నిర్వహించేందుకు అవకాశం ఉంటుందని సూచిస్తున్నారు.

మనిషి జీవితంలో మరణం కూడా సహజమైన భాగమే. అలాంటి సమయంలో కుటుంబ సభ్యులకు అవసరమైన గౌరవం, గోప్యత, సంప్రదాయాలకు అనుగుణమైన వసతులు కల్పించడం ఆధునిక నగర నిర్మాణంలో కూడా అంతే ముఖ్యమనే చర్చ ఇప్పుడు మరింత బలంగా వినిపిస్తోంది.