టీటీడీకి 10 గంటల్లో రూ.96.98 కోట్ల విరాళాలు.. కొత్త డోనర్ పాలసీకి ముందే ఆల్‌టైమ్ రికార్డు

కలియుగ వైకుంఠమైన తిరుమలలో టీటీడీ చరిత్రలోనే అరుదైన రికార్డు నమోదైంది. కేవలం 10 గంటల వ్యవధిలోనే భక్తులు రూ.96.98 కోట్ల విరాళాలు సమర్పించి సరికొత్త చరిత్ర సృష్టించారు. దాతలకు వర్తించే కొత్త డోనర్ పాలసీ అమల్లోకి రాకముందే పాత విధానంలోని సదుపాయాలను పొందాలనే ఉద్దేశంతో వేలాది మంది భక్తులు భారీగా విరాళాలు అందించారు.

టీటీడీ పాలకమండలి ఇటీవల డోనర్ పాలసీలో కీలక మార్పులకు ఆమోదం తెలిపింది. సామాన్య భక్తులకు దర్శన అవకాశాలు మెరుగుపడేలా దాతలకు కల్పించే ప్రత్యేక దర్శన సౌకర్యాల్లో మార్పులు చేసింది. ఈ కొత్త విధానం జూలై 15 నుంచి అమల్లోకి వస్తుందని ప్రకటించడంతో, జూలై 14 అర్ధరాత్రి వరకు పాత విధానం వర్తిస్తుందని టీటీడీ స్పష్టం చేసింది. దీంతో మధ్యాహ్నం 2 గంటల నుంచి అర్ధరాత్రి వరకు విరాళాల వెల్లువ కొనసాగింది.

టీటీడీ వివరాల ప్రకారం 2,354 మంది భక్తులు ఆన్‌లైన్ ద్వారా, 106 మంది ఆఫ్‌లైన్ ద్వారా వివిధ ట్రస్టులకు విరాళాలు సమర్పించారు. రూ.1 లక్ష నుంచి రూ.10 లక్షల మధ్య 1,212 మంది, రూ.10 లక్షల నుంచి రూ.25 లక్షల మధ్య 1,246 మంది విరాళాలు అందించగా, రూ.కోటి కంటే ఎక్కువ మొత్తాన్ని ఇద్దరు భక్తులు సమర్పించారు.

కొత్త డోనర్ పాలసీ ప్రకారం విరాళాల మొత్తాన్ని ఆధారంగా చేసుకుని దాతలకు ప్రత్యేక ప్రవేశ దర్శనం, సుపథం దర్శనం, వీఐపీ బ్రేక్ దర్శనం, సుప్రభాత సేవ టికెట్లు వంటి సౌకర్యాలను వివిధ స్థాయిల్లో కేటాయించనున్నారు. సామాన్య భక్తుల దర్శన సమయంపై ప్రభావం తగ్గించడమే ఈ మార్పుల ప్రధాన ఉద్దేశమని టీటీడీ వెల్లడించింది.

జూన్ 26 నాటికి టీటీడీలో మొత్తం 1,97,888 మంది దాతలు నమోదు కాగా, కొత్త పాలసీ ప్రకటించిన ఒక్క రోజులోనే నమోదైన రూ.96.98 కోట్ల విరాళాలు టీటీడీ చరిత్రలోనే అత్యధికంగా నమోదైన ఒకరోజు డొనేషన్‌గా నిలిచాయి.