మనసును కలిచివేసిన ఘటన.. అమల సినిమాలకు గుడ్‌బై చెప్పిన అసలు రీజన్ ఇదే!

టాలీవుడ్, కోలీవుడ్‌లో స్టార్ హీరోయిన్‌గా ఒక వెలుగు వెలిగిన నటి అమల అక్కినేని పెళ్లి తర్వాత సినిమాలకు దూరం కావడానికి అక్కినేని కుటుంబ ఆంక్షలే కారణమని చాలా మంది భావించారు. అయితే అందరూ అనుకున్నట్లు అది నిజం కాదని, తన నిర్ణయం వెనుక పూర్తిగా వేరే కారణం ఉందని అమల ఇటీవల ఓ ఇంటర్వ్యూలో వెల్లడించారు.

కెరీర్‌లో వరుస సినిమాలతో బిజీగా ఉన్న రోజుల్లో దాదాపు ఎనిమిదేళ్ల పాటు ఉదయం నుంచి రాత్రి వరకు షూటింగ్‌లతోనే గడిచిపోయేదని అమల తెలిపారు. ఒకేసారి రెండు, మూడు సినిమాల్లో నటించడం వల్ల తీవ్ర మానసిక ఒత్తిడికి గురయ్యానని, అందుకే కొంతకాలం కెమెరాకు దూరంగా ఉండి ప్రపంచాన్ని చూడాలని నిర్ణయించుకున్నానని చెప్పారు.

ఆ సమయంలో చేసిన ప్రయాణాలే తన జీవితాన్ని పూర్తిగా మార్చేశాయని అమల వెల్లడించారు. రోడ్లపై ఆకలితో అలమటిస్తున్న జంతువులు, ప్రమాదాల్లో గాయపడిన మూగజీవులు, పంజరాల్లో బంధించబడిన పక్షులు, హింసకు గురైన పాములు వంటి దృశ్యాలు తన మనసును తీవ్రంగా కలిచివేశాయని చెప్పారు. ఆ క్షణంలో కెమెరా ముందు నటించడం కంటే సమాజంలో మూగజీవుల కోసం పని చేయడం ఎంతో అవసరమని తనకు అర్థమైందని పేర్కొన్నారు.

అప్పటి నుంచి జంతు సంక్షేమం కోసం కృషి చేయాలని నిర్ణయించుకున్న అమల, ప్రభుత్వ అధికారులను కలిసి జంతు సంరక్షణకు సంబంధించిన అంశాలపై పనిచేయడం ప్రారంభించారు. ఈ క్రమంలోనే నాగార్జునతో వివాహం అనంతరం 'బ్లూ క్రాస్ హైదరాబాద్' అనే స్వచ్ఛంద సంస్థను సహ-వ్యవస్థాపకురాలిగా ప్రారంభించి, జంతువుల రక్షణ, సంక్షేమానికి తన జీవితాన్ని అంకితం చేశారు.

తాను సినిమాలను వదిలేయడానికి కుటుంబ సభ్యులు ఎలాంటి ఆంక్షలు విధించలేదని, అది పూర్తిగా తన వ్యక్తిగత నిర్ణయమేనని అమల స్పష్టం చేశారు. కుటుంబ బాధ్యతలతో పాటు సేవా కార్యక్రమాలను సమతుల్యంగా కొనసాగించానని చెప్పారు. అయితే మంచి కథలు, ప్రత్యేకమైన పాత్రలు వస్తే మాత్రం నటించడానికి ఎప్పుడూ సిద్ధంగానే ఉంటానని తెలిపారు. అందుకే 'లైఫ్ ఈజ్ బ్యూటిఫుల్', 'ఒకే ఒక జీవితం' వంటి చిత్రాల్లో తిరిగి నటించి ప్రేక్షకుల ప్రశంసలు అందుకున్నారు.

స్టార్ హీరోయిన్‌గా కోట్లాది మంది అభిమానులను సంపాదించిన అమల... చివరికి తన మనసుకు నచ్చిన సేవా మార్గాన్ని ఎంచుకోవడం వెనుక ఉన్న ఈ అసలు కారణం ఇప్పుడు మరోసారి సోషల్ మీడియాలో వైరల్ అవుతోంది.