సెనెగల్‌పై బెల్జియం సంచలన కమ్‌బ్యాక్.. ప్రీక్వార్టర్స్‌లోకి గ్రాండ్ ఎంట్రీ

ఫిఫా ప్రపంచకప్ 2026 రౌండ్ ఆఫ్ 32లో బెల్జియం అద్భుతమైన పోరాటంతో సంచలన విజయాన్ని నమోదు చేసింది. సెనెగల్‌తో జరిగిన ఉత్కంఠభరిత మ్యాచ్‌లో ఒక దశలో 0-2తో వెనుకబడిన బెల్జియం... ఆ తర్వాత అసాధారణంగా పుంజుకుని 3-2 తేడాతో గెలిచి ప్రీక్వార్టర్స్‌లో అడుగుపెట్టింది. మ్యాచ్ చివరి క్షణాల్లో యూరి టైల్‌మన్స్ సాధించిన పెనాల్టీ గోల్ బెల్జియంకు చిరస్మరణీయ విజయాన్ని అందించింది.

మ్యాచ్ ఆరంభంలో ఇరు జట్లు సమంగా పోరాడినా... తొలి అర్ధభాగంలో సెనెగల్ ఆధిపత్యం చెలాయించింది. హబీబ్ దియారా రీబౌండ్ బంతిని గోల్‌గా మలచడంతో సెనెగల్ 1-0 ఆధిక్యంలోకి వెళ్లింది. రెండో అర్ధభాగం ప్రారంభమైన కొద్ది నిమిషాల్లోనే ఇస్మాయిలా సార్ మరో గోల్ చేసి స్కోరును 2-0కు చేర్చాడు. దీంతో మ్యాచ్ పూర్తిగా సెనెగల్ వైపు వెళ్లినట్లే కనిపించింది.

అయితే బెల్జియం కోచ్ చేసిన వ్యూహాత్మక మార్పులు మ్యాచ్‌ను మలుపుతిప్పాయి. 70వ నిమిషం తర్వాత బెల్జియం దూకుడు పెంచింది. రోమేలు లుకాకు తొలి గోల్ చేయగా... కొద్ది సేపటికే యూరి టైల్‌మన్స్ మరో గోల్ సాధించి స్కోరును 2-2తో సమం చేశాడు. నిర్ణీత సమయంలో ఫలితం తేలకపోవడంతో మ్యాచ్ ఎక్స్‌ట్రా టైమ్‌కు వెళ్లింది.

ఎక్స్‌ట్రా టైమ్ చివరి నిమిషాల్లో బెల్జియంకు కీలక పెనాల్టీ లభించింది. వీఏఆర్ పరిశీలన అనంతరం అంపైర్ పెనాల్టీ ఇవ్వగా... యూరి టైల్‌మన్స్ ఎలాంటి ఒత్తిడికి లోనుకాకుండా గోల్‌గా మలిచాడు. దీంతో బెల్జియం 3-2తో సంచలన విజయాన్ని అందుకుని ప్రీక్వార్టర్స్‌కు అర్హత సాధించింది. మరోవైపు అద్భుతంగా పోరాడిన సెనెగల్ టోర్నీకి వీడ్కోలు పలికింది.

ఈ మ్యాచ్‌లో ఇస్మాయిలా సార్ మరో గోల్ చేయడంతో... ఒకే ప్రపంచకప్ ఎడిషన్‌లో అత్యధిక గోల్స్ చేసిన ఆఫ్రికన్ ఆటగాళ్ల జాబితాలో కెమరూన్ దిగ్గజం రోజర్ మిల్లా రికార్డును సమం చేశాడు. అయితే చివర్లో బెల్జియం చూపిన పట్టుదల, ఆత్మవిశ్వాసం ఫుట్‌బాల్ అభిమానులను విశేషంగా ఆకట్టుకుంది.