గుండుపై ట్రోలింగ్‌.. ఎమ్మెల్యే గళ్లా మాధవి ఆవేదన

తిరుమల శ్రీవేంకటేశ్వర స్వామివారిని దర్శించుకుని తలనీలాలు సమర్పించిన తనపై సోషల్ మీడియాలో అవమానకర పోస్టులు పెడుతున్నారని గుంటూరు వెస్ట్ ఎమ్మెల్యే గళ్లా మాధవి ఆవేదన వ్యక్తం చేశారు. భక్తి భావంతో చేసిన చర్యను కూడా రాజకీయంగా మలచి ట్రోలింగ్ చేయడం దారుణమని ఆమె వ్యాఖ్యానించారు.

గత వారం తిరుమల శ్రీవారిని దర్శించుకున్న ఎమ్మెల్యే గళ్లా మాధవి, స్వామివారికి తలనీలాలు సమర్పించారు. అయితే ఆ ఘటన తర్వాత కొంతమంది సోషల్ మీడియా వేదికగా తనపై అనుచిత వ్యాఖ్యలు, అవమానకర పోస్టులు పెడుతున్నారని ఆమె ఆరోపించారు. మహిళా నాయకుల వ్యక్తిగత జీవితం, భక్తి విశ్వాసాలను లక్ష్యంగా చేసుకుని విమర్శలు చేయడం సమాజానికి మంచిది కాదని ఆమె అన్నారు.మహిళల పట్ల గౌరవం లేకుండా రాజకీయాలు చేయడం చాలా ప్రమాదకరమని గళ్లా మాధవి ఆవేదన వ్యక్తం చేశారు. విధానపరమైన అంశాలపై విమర్శలు చేయాల్సిన చోట, వ్యక్తిగత దూషణలకు దిగడం వైఎస్సార్‌సీపీ నేతల దిగజారుడుతనానికి నిదర్శనమని ఆమె వ్యాఖ్యానించారు.

అలాగే మాజీ మంత్రి గుడివాడ అమర్‌నాథ్ చేసిన వ్యాఖ్యలను కూడా ఆమె తీవ్రంగా ఖండించారు. హోంమంత్రి అనితపై చేసిన వ్యాఖ్యలు అభ్యంతరకరంగా ఉన్నాయని, వాటిని వైఎస్సార్‌సీపీ నేతలు సమర్థించడం మరింత దురదృష్టకరమని ఆమె అన్నారు. మహిళల పట్ల గౌరవం ఉందని చెప్పుకునే నాయకులే ఇలాంటి వ్యాఖ్యలు చేయడం సరికాదని ప్రశ్నించారు.
కుల ప్రస్తావనలతో అంశాన్ని డైవర్ట్ చేయడం కాకుండా, చేసిన వ్యాఖ్యలపై బాధ్యతగా స్పందించాల్సిన అవసరం ఉందని గళ్లా మాధవి అన్నారు. మహిళల్ని వ్యక్తిగతంగా టార్గెట్ చేసి రాజకీయాలు చేయడం సరైన పద్ధతి కాదని ఆమె హితవు పలికారు.

మహిళలను అవమానించే రాజకీయ సంస్కృతిని ప్రజలు ఇప్పటికే తిరస్కరించారని, ఇప్పటికైనా రాజకీయ నాయకులు బాధ్యతగా వ్యవహరించాలని ఎమ్మెల్యే గళ్లా మాధవి కోరారు.