2029 ఎన్నికలకు 'మావిగన్' ఎజెండాతోనే వెళ్తాం: జగన్

వైఎస్సార్‌సీపీ అధ్యక్షుడు, మాజీ ముఖ్యమంత్రి వైఎస్ జగన్‌మోహన్ రెడ్డి 2029 ఆంధ్రప్రదేశ్ అసెంబ్లీ ఎన్నికల కోసం తమ పార్టీ రాజకీయ ఎజెండాను ప్రకటించారు. వచ్చే ఎన్నికలు 'మావిగన్ వర్సెస్ అమరావతి' ఎజెండా మధ్య జరుగుతాయని పేర్కొన్నారు. 'మావిగన్'నే తమ పార్టీ ఎన్నికల మేనిఫెస్టోలో చేర్చి ప్రజల ముందుకు వెళ్తామని వెల్లడించారు.

అమరావతికి తాను వ్యతిరేకం కాదని, రాజధాని పేరుతో జరుగుతున్న అవినీతికే వ్యతిరేకమని జగన్ స్పష్టం చేశారు. రాజధాని ప్రాంతంలో రైతుల సమస్యలు, భూసేకరణ అంశాలపై ప్రశ్నిస్తే వాటిని తప్పుగా చిత్రీకరిస్తున్నారని ఆరోపించారు.

అమరావతి రైతులు తమ సమస్యలను తన దృష్టికి తీసుకువచ్చారని, వారి అభ్యర్థన మేరకే వైఎస్సార్‌సీపీ నేతలు రాజధాని ప్రాంతాన్ని సందర్శించారని చెప్పారు. రైతుల కోసం వెళ్లిన నేతలపై దాడులు చేసి, తిరిగి వారిపైనే కేసులు నమోదు చేయడం దురదృష్టకరమన్నారు.

రాష్ట్రంలో రైతుల పరిస్థితి ఆందోళనకరంగా ఉందని జగన్ వ్యాఖ్యానించారు. పొగాకు, మామిడి, ఆక్వా సహా పలు పంటల రైతులు గిట్టుబాటు ధరలు లేక ఇబ్బందులు పడుతున్నారని, రైతులు రోడ్డెక్కి నిరసనలు చేపట్టడం ప్రభుత్వ వైఫల్యానికి నిదర్శనమని అన్నారు. కూటమి ప్రభుత్వం వ్యవసాయ రంగాన్ని నిర్లక్ష్యం చేస్తోందని విమర్శించారు.

రాష్ట్రంలో శాంతిభద్రతలు క్షీణించాయని, న్యాయవ్యవస్థపై ప్రజల్లో ఆందోళన పెరుగుతోందని జగన్ ఆరోపించారు. విజయవాడ, కర్నూలు, తెనాలి, శ్రీకాకుళం తదితర ప్రాంతాల్లో జరిగిన ఘటనలను ప్రస్తావిస్తూ చట్టవ్యవస్థపై ప్రశ్నలు లేవనెత్తారు.

కుల, మతాల పేరుతో సమాజంలో విద్వేషాలు రెచ్చగొట్టడం సరికాదని, అధికారంలో ఉన్నవారు బాధ్యతాయుతంగా వ్యవహరించాలని సూచించారు. ప్రజా సమస్యల పరిష్కారమే వైఎస్సార్‌సీపీ లక్ష్యమని, అదే ఎజెండాతో 2029 ఎన్నికల్లో ప్రజల తీర్పు కోరతామని జగన్ తెలిపారు.