హైదరాబాద్‌లో మటన్ పేరుతో కల్తీ మాంసం విక్రయం.. DNA పరీక్షల్లో గేదె దూడ మాంసంగా నిర్ధారణ

హైదరాబాద్‌లో మటన్ పేరుతో కల్తీ మాంసం విక్రయించిన ఘటనలో DNA పరీక్షలు కీలక విషయాన్ని వెలుగులోకి తెచ్చాయి. మటన్‌గా విక్రయిస్తున్న మాంసంలో గేదె దూడ మాంసం కలిపినట్లు శాస్త్రీయంగా నిర్ధారణ కావడంతో దుకాణ యజమానిపై పోలీసులు కేసు నమోదు చేసి దర్యాప్తును వేగవంతం చేశారు.

జూలై 1న హబీబ్‌నగర్ పోలీస్ స్టేషన్ పరిధిలోని మల్లేపల్లి బడా మసీదు సమీపంలోని ఓ మాంసం దుకాణంపై హైదరాబాద్ ఫుడ్ అడల్టరేషన్ సర్వైలెన్స్ టీమ్ (H-FAST), GHMC వెటర్నరీ విభాగం, హబీబ్‌నగర్ పోలీసులు, CCS అధికారులు సంయుక్తంగా దాడులు నిర్వహించారు. వినియోగదారుల ఫిర్యాదుల నేపథ్యంలో తనిఖీలు చేపట్టిన అధికారులు దుకాణంలో ఉన్న సుమారు 50 కిలోల అనుమానాస్పద మాంసాన్ని స్వాధీనం చేసుకుని పరీక్షల కోసం పంపించారు.

ICAR–నేషనల్ మీట్ రీసెర్చ్ ఇన్‌స్టిట్యూట్‌లో నిర్వహించిన DNA పరీక్షల్లో, మటన్‌గా విక్రయిస్తున్న మాంసంలో గేదె దూడ మాంసం కలిపినట్లు నిర్ధారణ అయింది. దీంతో DNA నివేదిక ఆధారంగా దుకాణ యజమానిపై మోసం, ఆహార కల్తీ చట్టాల ఉల్లంఘనతో పాటు ఇతర సంబంధిత సెక్షన్ల కింద పోలీసులు కేసులు నమోదు చేశారు. త్వరలోనే ఈ కేసులో ఛార్జ్‌షీట్ దాఖలు చేసే అవకాశం ఉందని అధికారులు తెలిపారు.

ఆహారంలో కల్తీకి పాల్పడే వారిపై కఠిన చర్యలు తీసుకుంటామని అధికారులు హెచ్చరించారు. ప్రజలు లైసెన్స్ ఉన్న, విశ్వసనీయ దుకాణాల నుంచే మాంసం కొనుగోలు చేయాలని, అనుమానం ఉంటే వెంటనే సంబంధిత అధికారులకు సమాచారం ఇవ్వాలని సూచించారు. అలాగే, ఈ ఘటన ఒక్క దుకాణానికి మాత్రమే సంబంధించినదని, హైదరాబాద్‌లోని అన్ని మాంసం దుకాణాలపై ఇలాంటి ఆరోపణలు చేయడానికి ప్రస్తుతం ఎలాంటి ఆధారాలు లేవని అధికారులు స్పష్టం చేశారు.