ఆధార్ కార్డు అప్డేట్ ఉచితం.. ఏపీ విద్యార్థులకు గుడ్ న్యూస్..

ఆంధ్రప్రదేశ్‌లోని విద్యార్థులకు రాష్ట్ర ప్రభుత్వం శుభవార్త అందించింది. విద్యార్థులు తమ ఆధార్ కార్డులో బయోమెట్రిక్ వివరాలను ఉచితంగా అప్డేట్ చేసుకునేందుకు, కొత్త ఆధార్ నమోదు చేసుకునేందుకు స్కూళ్లలోనే ప్రత్యేక ఆధార్ క్యాంపులను ఏర్పాటు చేయనుంది. దీంతో ఆధార్ సేవల కోసం పట్టణాలు, నగరాల్లోని కేంద్రాలకు వెళ్లాల్సిన అవసరం లేకుండా తమ గ్రామంలోని పాఠశాలలోనే సేవలు పొందే అవకాశం కల్పిస్తోంది.

ప్రభుత్వం రెండు విడతలుగా ఈ ప్రత్యేక క్యాంపులను నిర్వహించనుంది. తొలి విడత జూలై 14 నుంచి 17 వరకు, రెండో విడత జూలై 21 నుంచి 24 వరకు రాష్ట్రవ్యాప్తంగా ప్రభుత్వ పాఠశాలల్లో ఆధార్ సేవలు అందుబాటులో ఉంటాయి. ఈ క్యాంపుల్లో బయోమెట్రిక్ అప్డేట్‌తో పాటు కొత్త ఆధార్ నమోదు కూడా పూర్తిగా ఉచితంగా నిర్వహించనున్నారు.

ప్రత్యేకంగా 5 నుంచి 17 సంవత్సరాల మధ్య వయస్సు గల విద్యార్థులు తప్పనిసరిగా తమ బయోమెట్రిక్ వివరాలను అప్డేట్ చేసుకోవాలని అధికారులు సూచిస్తున్నారు. ఆధార్‌లో సరైన వివరాలు ఉండటం వల్ల ప్రభుత్వ సంక్షేమ పథకాలు, అపార్ ఐడీ నమోదు, స్కాలర్‌షిప్‌లు, ఇతర ప్రభుత్వ సేవలు పొందడంలో ఎలాంటి ఇబ్బందులు ఉండవు.

అప్డేట్ లేదా కొత్త ఆధార్ కోసం అవసరమైన పత్రాలు:

* ప్రస్తుతం ఉన్న ఆధార్ కార్డు (అప్డేట్ కోసం)
* జనన ధృవీకరణ పత్రం
* తల్లిదండ్రుల ఆధార్ కార్డులు (కొత్త నమోదు కోసం)
* పదో తరగతి మార్కుల మెమో లేదా ఇతర గుర్తింపు పత్రాలు (వివరాల మార్పుల కోసం)
* చిరునామా ధృవీకరణ పత్రం (అవసరమైతే)

చిన్న వయస్సులో ఆధార్ పొందిన పిల్లల బయోమెట్రిక్ వివరాలు వయస్సు పెరిగే కొద్దీ మారే అవకాశం ఉండటంతో, వాటిని సమయానికి అప్డేట్ చేసుకోవడం ఎంతో ముఖ్యమని అధికారులు సూచిస్తున్నారు. ఈ అవకాశాన్ని తల్లిదండ్రులు సద్వినియోగం చేసుకుని తమ పిల్లల ఆధార్ వివరాలను సరిచేయించాలని ప్రభుత్వం కోరుతోంది.