తిరుమలలో రికార్డు.. టీటీడీ లగేజీ సేవలకు భారీ స్పందన

శ్రీవారి దర్శనానికి తిరుమలకు వచ్చే భక్తుల సంఖ్య రోజురోజుకూ పెరుగుతోంది. భక్తుల సౌకర్యార్థం తిరుమల తిరుపతి దేవస్థానం (టీటీడీ) అందిస్తున్న ఆధునిక లగేజీ డిపాజిట్-డెలివరీ సేవలకు విశేష స్పందన లభిస్తోంది. 2026 ఏప్రిల్, మే నెలల్లో మాత్రమే 51 లక్షలకు పైగా భక్తులు ఈ సేవలను వినియోగించుకోవడం విశేషం.

తిరుమలలో 66 లగేజీ కౌంటర్లు, 345 మంది సిబ్బందితో 24 గంటలపాటు మూడు షిఫ్టుల్లో సేవలు అందిస్తున్నారు. ఫేస్ రికగ్నిషన్ టెక్నాలజీ, క్యూఆర్ కోడ్ ఆధారిత వ్యవస్థ ద్వారా లగేజీని భద్రపరచి, కేవలం నిమిషంలోపే తిరిగి అందిస్తున్నారు.

అలిపిరి, శ్రీవారి మెట్టు మార్గాలతో పాటు ఫ్రీ హాల్, వైకుంఠం క్యూ కాంప్లెక్స్, నారాయణగిరి షెడ్, రూ.300 దర్శనం హాల్, కల్యాణకట్ట ప్రాంతాల్లో కూడా లగేజీ డిపాజిట్ కేంద్రాలు అందుబాటులో ఉన్నాయి. ఈ సేవలన్నీ పూర్తిగా ఉచితంగా అందించడం టీటీడీ ప్రత్యేకత.

ఇటీవల మూడు రోజుల్లోనే 3 లక్షలకు పైగా భక్తులు ఈ సేవలను వినియోగించుకోవడం, టీటీడీపై భక్తుల విశ్వాసానికి నిదర్శనంగా నిలుస్తోంది. భక్తులు అధికారిక డిపాజిట్ కేంద్రాల్లో మాత్రమే తమ లగేజీ, సెల్‌ఫోన్లను భద్రపరచాలని టీటీడీ అధికారులు సూచిస్తున్నారు. శ్రీ వేంకటేశ్వర స్వామి దర్శనాన్ని మరింత ప్రశాంతంగా, సురక్షితంగా చేసేందుకు ఈ సేవలు ఎంతో ఉపయోగపడుతున్నాయి.